نوح العصفور

مراجيح ومولد فالبلد داير
أراجوز فعيشته من زمان حاير
مداس وغيره متشالين ع الراس
وعروسته مصر .. الحلوه أم الضفاير
وعجبي ... ؟
أهي ناس ونازله فالبسيط طخبيط
فاكراه يا عيني واد حيرك وحويط
أتاريه مغيب م الزمن والعيشه
مكتوب يقضي بين السكك تنطيط
وعجبي ... ؟
سفينه حايره بين البحور والشط
وعليها كل الغلابه اتحط
عايزنها تغرق مايبان لها صاحب
يا إما تمشي ع الصراط والخط
وعجبي ... ؟
عصفور لحال الدنيا إتخرس ما يبوح
صبح عليل فالسما أشبه بطير مدبوح
تايه فأرض الله صعبان عليه الحال
بطل خلاص الغنا هايقضي عمره ينوح
وعجبي