اسمعوا وعوا

يا كل الحاضرين
واللى منكم هنا يعلم الغايبين
بأننا هنحكى حكاية
بكل ما سمعتوا من حكايا
لأجل كل حى يعرف
مقصودنا إيه آخر الرواية
صلوا بينا عالهادى
وقولوا يارب يا هادى
ارحم يا رحيم البلاد
من شرور العباد للعباد
حكايتنا لشعب غلبان
سكان حوارى فمصر
طيبين وغلب الدنيا
على وشوش تنام مالعصر
لا يهمهم حكم ولا سلطة
ولا حتى نومه فقصر
يهمهم الكرامة لفوق
والعقل صاحى وفوق
والقيمة زى العلم
عالى مرفرف لفوق
قاموا بثورة شرف
على كل فساد وترف
وعالتلكيك والقرف
وكمان تلال الروتين
لا تظاهروا عالجاتوه
والحب واللى أبوه
اتظاهروا على رغيف
نضيف نفسهم يشوفوه
ومعاه حبه بروتين
مش شرط يكون كفيار
ولا لحمه حمرا يا عين
كفاية حبة فول
مقلى جمبهم بيضتين
وعشان تكمل الثورة
وقف جمبها العسكر
والشعب راضٍ ومبسوط
وحياته طعم السكر
وعدت أيام كتير
ودا كان من زمان
وحكم بعد مشوار طويل
جماعة الإخوان
طبل وزمر كتير
والكل بقى فرحان
فمصر رئيس إخوان
واسمه "مرسى" كمان
راح دوغرى عالميدان
وفتحلنا بثقة (الجاكتة)
وقال يا شعب افرح
دا الفرحة 100 حتة
المصرى حر طليق
وشرعيته فايدة كمان
النهاردة يوم العيد
يا أجدع الجدعان
مع أن يوم القسم
النور عليه اتقطع
ومحدش فينا خد باله
إنه فال واحنا هنتخدع
دا النور هيقطع ياما
والضلمة بالفواتير
ومهما كنت كبير
متبانش فالضلمة
الضلمة مش فالنور
دى كمان ضلمة عقول
تكذب وكمان تقول
دا انتوا الكدابين
ناس وبيوت تموت
وضحايا صعب تفوت
والوضع بقى أنيل
ودولا فى غير ملكوت
الدنيا وردية معاهم
ورئيسهم فقصره وياهم
والبلد فكف الإيد
ولا جوا القلب ولا جواهم
الفولة إن البيه
كان عاوز الكرسى
والكل يشاور ليه
أهو دا الرئيس "مرسى"
دا حبيب الكل الغالى
وننى عين الإخوان
وتروح فداهية البلد
ويغور الشعب كمان
الكل لازم يعرف
إن الشعب غلط
ولا اد تطور بسرعة
ولا اد بلع الزلط
دا الشعب لازم يصلى
ويكفر عن ذنوبه
ويشوف رئيسه الحر
لازقة الحراسة فتوبة
فكل حتة حراسة
وجوا بيوت الله
طب حتى عيب اختشوا
دا ربنا بيرعاه
أخرتها قامت ثورة
من كل المصريين
الشعب ويا الجيش
صمام مصر الأمين
وانزاحت الغمة
وعادت اللمة
وانقطعت شجرة اللعنات
أم فروع سودا
وعمرها ما تعود
وإن عادت العودة
دى نار لسانها انطفى
وبوم وشها اختفى
ما عادوا خلاص ينفعوا
رسالة لشعب الثورة
يا شعب ..... اسمعوا وعواااا