لو هتسألنى!

لو هتسألنى أيه رأيى
مستحيل دى تنفعك
لو هقولّك حاجة تانية
أبقى بكدب وأخدعك.
إنتو مختلفين يا صاحبى
دا انتو يمكن عكس بعض
مش هجامل مش هخبّى
صعب يوم تبقوا لبعض.
أيوه فى إعجاب ما بينكم
بس إعجاب بالملامح
بس لما نشوف صفاتكم
نلقى فرق كبير وواضح.
لما دى هتعيش معاها
لازم الخلافات هتحصل
إللى فى هواك مش هواها
والحياة بينكم هتفشل.
إنت بتقول راح تغيّر
من سلوكها ومن عاداتها
بس هل هيه هتقدر
إنها تقلب حياتها؟
عارف إن ما بينكو حب
دية نقطة فى اعتبارى
بس أحياناً نحب
ويكون البُعد اضطرارى.
فى احتمال وارد بجد
حبكم بينكم يقرّب
بس قبل خطوة جد
اختبرها كتير وجرّب.
ده كلامى واللى عندى
سألتنى وأنا قلتهولك
ربنا يوفَق يا صاحبى
كل خير بتمنهولك.