"يا ابنى هتسيبنى لمين"؟

فكرت فى يوم إنك تزور أم لشهيد ؟! طب فكرت فى يوم تكلم أم شهيد فى التليفون؟
طب فكرت فى يوم إنك تعيد مع أم لشهيد؟
معلش أنا أسف أنت عارف الأول يعنى إيه أم لشهيد ؟ لا أصلا أنت حاسس بالكلام ؟؟
متفكرش كتير أنا هوفر عليك لو قرأت الكلام اللى فوق ودموعك منزلتش أعرف إنك إنسان معدوم الإحساس، أيوه هى دى الحقيقة مع الأسف، لا مش بس كده أنت لو شفت أم الشهيد
خالد سعيد وهى بتتضرب وتتهان هى وبنتها فى المحكمة الأسبوع اللى فات ولم يتمعر وجهك وتغضب لها اعرف إنك معندكش إحساس.
كل ما أفتكر أمى يوم جمعة الغضب وهى بتقولى بلاش تنزل، هتسيبنى لمين؟
مع إنها عندها ولد غيرى بقعد أبكى على أم خالد سعيد اللى مكنش عندها غيره
دلوقتى بس فهمت معنى كلمة أمى هتسبينى لمين؟
خالد سعيد مات عشان البلد دى، وساب أمه لوحدها اتهانت واتضربت فى المحكمة ومشفناش أى حد بيدافع عنها
ومين أصلا هيدافع عنها مدام سندها وظهرها تحت التراب
أنت عارف مصر فيها كام أم زى أم خالد سعيد عارف مصر فيها كام أم لشهيد؟ منهم اللى مات فى العبارة واللى مات فى القطر واللى مات غريق وهو بيهرب منها لما حس إنها كرهاه أيوه كرهاه ما هى البلد اللى عايزة ولادها تحت ترابها تبقى بتكرهم
هو أصلا إيه الفرق بين البلد دلوقتى والبلد قبل الثورة؟؟ ولا اى فرق
البلد قبل الثورة كانت بتحب ولادها ميتين وبعد الثورة بردوا بتحب ولادها ميتين من اول محمد محمود واحنا كان لازم نفهم ان فيه حاجه غلط مرورا بمجلس الوزراء وماسبيرو والعباسية والاتحادية ولسه مش عارفين مستخبيلنا ايه تانى؟
انت فاكر جابر جيكا يا دكتور مرسى ايوه هو اللى كان بيساندك فى الانتخابات مين اللى قتل جابر جيكا يا ريس؟
دمه مجاش ليه؟ طب دم الشهيد مجاش ليه؟؟
هو أنت إزاى بتنام ؟ أنت فعلا ضميرك مرتاح؟
الطريق اللى انت ماشى فيه غلط يا مرسى غلط.
هتقول لربنا إيه لما يسألك على شعبك اللى مات فى عهدك؟
مش لازم مات إزاى بس مات ياريس
لو لقيتلك إجابة تقولها لربنا كمل نهضتك.