يا ابنى هتسيبينى لمين"؟

فكرت فى يوم انك تزور ام لشهيد ؟! طب فكرت فى يوم تكلم ام لشهيد فى التليفون؟
طب فكرت فى يوم انك تعيد مع ام لشهيد؟ معلش انا اسف انت عارف الاول يعنى ايه ام لشهيد؟ لا اصلا انت حاسس بالكلام؟؟
متفكرش كتير انا هوفر عليك لو قرأت الكلام اللى فوق ودموعك منزلتش اعرف انك انسان معدوم الاحساس،ايوه هى دى الحقيقة مع الاسف،لا مش بس كده انت لو شفت ام الشهيد
خالد سعيد وهى بتتضرب وتتهان هى وبنتها فى المحكمة الاسبوع اللى فات ولم يتمعر وجهك
وتغضب لها اعرف انك معندكش احساس .
كل ما افتكر امى يوم جمعة الغضب وهى بتقولى بلاش تنزل،هتسيبنى لمين؟
مع انها عندها ولد غيرى بقعد ابكى على ام خالد سعيد اللى مكنش عندها غيره
دلوقتى بس فهمت معنى كلمة امى هتسيبنى لمين؟
خالد سعيد مات عشان البلد دى,وساب امه لوحدها اتهانت واتضربت فى المحكمة
ومشفناش اى حد بيدافع عنها
ومين اصلا هيدافع عنها مدام سندها وظهرها تحت التراب
انت عارف مصر فيها كام ام زى ام خالد سعيد عارف مصر فيها كام ام لشهيد؟
منهم اللى مات فى العبارة واللى مات فى القطر واللى مات غريق وهو بيهرب منها
لما حس انها كرهاة ايوه كرهاه ما هى البلد اللى عايزة ولادها تحت ترابها تبقى بتكرهم
هو اصلا ايه الفرق بين البلد دلوقتى والبلد قبل الثورة؟؟ ولا اى فرق
البلد قبل الثورة كانت بتحب ولادها ميتين وبعد الثورة بردوا بتحب ولادها ميتين
من اول محمد محمود واحنا كان لازم نفهم ان فيه حاجه غلط مرورا بمجلس الوزراء وماسبيرو والعباسية والاتحادية ولسه مش عارفين مستخبيلنا ايه تانى؟
انت فاكر جابر جيكا يا دكتور مرسى ايوه هو اللى كان بيساندك فى الانتخابات
مين اللى قتل جابر جيكا يا ريس؟
دمه مجاش ليه؟ طب دم الشهيد مجاش ليه؟؟
هو انت ازاى بتنام ؟ انت فعلا ضميرك مرتاح؟
الطريق اللى انت ماشى فيه غلط يا مرسى غلط.
هتقول لربنا ايه لما يسالك على شعبك اللى مات فى عهدك؟
مش لازم مات ازاى بس مات ياريس
لو لقيتك اجابة تقولها لربنا كمل نهضتك.