آيات إسكندرانية الأصل.. سعودية المسكن بتموت فى العاشرة مساء.. عملت له موقعا إلكترونيا.. وكل الناس فاكرينها منى الشاذلى بس «متنكرة»

عمرها 14 عاماً وتقيم فى المدينة المنورة

آيات إسكندرانية، تبلغ من العمر 14 عاماً فقط وتقيم فى المدينة المنورة، يكفيها من النوم فى اليوم 4 ساعات، هى الأولى على مدرستها، وتقضى 6 ساعات يوميا مع موقع «العاشرة مساء» الذى صنعته خصيصاً فهو برنامجها المفضل.
وضعت آيات لنفسها نظرية تقول عنها: «نجاح البنى آدم بيكون فى العشرين سنة الأولانيين، وأنا لما كنت فى مصر من 3 سنين كنت أصغر من كده بس لفت نظرى برنامج العاشرة مساء، وأعجبنى كبنت نموذج المذيعة فيه، وده طبيعى لأنى بدور على قدوة، وده تلاقى مع أنى مكنتش عايزة أبقى مراهقة عادية، كنت مهتمة يكون لى رأى فى اللى بيدور حوليا، ومن خلال دأبى على متابعة البرنامج حسيت إنى بتغير، وأنه بدأ يتشكل لى فكر، وهدف، ورؤية لمستقبلى، فقررت أقوم بشبه توثيق لحاجة زى العاشرة مساء اعترافاً بجميله عليا»، «ولما جيت السعودية مع أسرتى لقيت الناس هنا متعرفش غير الحاجات السيئة عن مصر، حتى زميلاتى المصريات اللى اتولدوا هنا ومبينزلوش مصر، شفت إنى لازم أشيل عبء الحديث عن بلدى، وأنه عندنا نماذج مضيئة، فعملت الموقع، بدأت بشىء صغير جداً وكل سنة كنت بكبره واحدة واحدة، وما استعجلتش على نجاحه، وكتير بيستغربوا من عدد الأعضاء، وهم من مصر والمغرب والجزائر، ولم يكن لى سابق معرفة معهم بل هم بأنفسهم شاركوا فى الموقع نتيجة متابعتهم للبرنامج وتعرفى بهم من خلال الموقع، حكوا لى عن حبهم للبرنامج لأنه بيناقش موضوعات موجودة فى مصر ولكنها تشبه ما يحدث عندهم، ولكن إعلامهم لا يتحدث عنها، وأنا أقضى مع الموقع ما بين 5 و 6 ساعات فى اليوم موزعة على أوقات متفرقة، ما بين تجديد آخر التحديثات فى مكتب الإدارة، ثم أقرأ جميع المواضيع الجديدة منذ آخر زيارة لى وأرد عليها، وأقوم ببعض التنظيمات داخل الموقع ثم أقرأ الرسائل الخاصة لبريدى (بريد الإدارة) وأقوم بتنفيذ ما يجب تنفيذه من الرسائل، ثم انتقل إلى البريد الخاص بالموقع el3shera.site@gmail.com وأقرأ رسائل الناس التى يرسلونها لنا لنوصلها للبرنامج وأى مشكلة بحس إنها صحيحة بابعتها للبرنامج عن طريق أحد مراسلى البرنامج اللى أعرفهم، والحمد لله دلوقت عدد المستخدمين (التسجيل) 5.000 شخص وعدد الزوار يتراوح مابين 200 و300 يومياً، وبيكون فى اجتماعات كل فترة مابين الإدارة وطاقم الإشراف بنحدد فيها أهم القوانين، وأهم الأشياء اللى حصلت والتصرف كان معها إزاى وبنضع بناء على ده القوانين والنظم، وبنقوم بعمل انتخابات فى فترة مدتها شهرين قبل 18يونيو (عيد ميلاد البرنامج والموقع) عن أفضل الأعضاء والأقسام فى الموقع، مع استفتاءات تشجيعية وتقديرية للناس اللى اشتغلت بجد طول العام بالموقع، ثم منذ بداية شهر 6 إلى يوم 18، الجديد اللى هضيفه دلوقتى هو تحويل الموقع إلى شركة استضافة وجعله موقع دوت كوم مستقلا وده فى خلال الشهرين القادمين، وناوية كمان أعمل إذاعة ولكن ليس لها علاقة بالموقع»، وعن أطرف المواقف التى تعرضت لها بسبب الموقع ، تقول: «وصلنى اتصال من إحدى المشرفات بالموقع إن فى حد دخل باسم منى الشاذلى، وعلى الفور دخلت وأغلقت الموقع لدقائق حتى أتأكد، ووجدت أنه شخص مع نفسه عمل كدهو أنه مسجل بيانات خاطئة، ليست لها علاقة بالأستاذة منى وبسؤاله لقيت إنه مش عارف يجاوب على أى سؤال، وعلى الفور قمت بمسح العضوية للشخص وقمت بحظر تسجيله عن طريق رقم الIP الخاص به»، ومن المواقف الصعبة التى تعرضت لها أيضاً، تقول: «دخل شخص مجنون ووضع أشياء مسيئة للبرنامج ومقدمته، واتهمهم بأشياء غير أخلاقية، وضعها فى وقت مافيش حد موجود فيه، تقريباً الفجر، ووضع تلك الأشياء دفعة واحدة فى جميع الأقسام، والحمد لله فى الصباح قمت بغلق الموقع، وحذفت كل هذا وحذفت عضويته طبعاً»، أما أطرف حاجة تضيف آيات إنه كتير من الناس بيفتكرونى إنى أنا منى الشاذلى وبتيجى رسائل تحيه، وطلبات لرقم تلفونى، ويقولوا هنبعت ليكى رسائل بس والله أسلم عليكى مش هضايقك والله، وأنا أفضل أحلف والله مش أنا يا جماعة، وأفتكر أنه مرة شخص بعت لى وقالى، أستاذة منى أنا النهاردة شوفتك وكنت عايز أسلم عليكى وماعرفتش، شوفتى بقى ؟قولته لا أنا مش هى والله، قالى وكمان مش عايزة تسلمى هنا، وخنقنى بعشرين رسالة بعد كده علشان أرجع نفس المكان أسلم عليه!!.
لمعلوماتك...
◄ %24 نسبة مشاهدة البيت بيتك
◄ %13.5 نسبة مشاهدة العاشرة مساء