زمن الشباب

(ماهر ودومه وحمدى) طلعوا متهمين !!
حتى (البرادعى) البطل متهوم مع (حمدين) !!
و(الفخرانى) كمان بكفالة فكوا إيديه
وفى خزنة المحكمه دفع كمان خمسين !!
...
بيقولوا أصل الحكومة حكومة الإخوان
عايزة تشوف الشباب لابس طرح نسوان
اللى لولاهم ما كانت نجحت الثورة
واللى لو لاهم ما كان الفجر هل وبان
...
واللى لولاهم ما كانت هتفت الملايين
بسقوط فريق اللصوص والعجزة والفاشلين
واللى لو لاهم ما كان "مرسى" طلع للنور
وصبح رئيس للبلد لكن تقول يا مين؟؟
...
يا خوانا سيبوا الشباب يحكم بفكر جديد
لسه عزيمته بخيرها ولسه قلبه حديد
وطموحه أكبر كتير من "مرسى والشاطر"
ومن شيوخ لسه فاكره فجر بكرة بعيد
...
يا ناس معدش الزمن زمن زعيط ومعيط
ولا زمن فيه رئيس يخطب فى قلب الغيط
ولا زمن راح يوافق تحكمه الإخوان
واللى يقول غير كدة لمؤاخذة يبقى عبيط
...