استقيلوا.. يمكن يرحمكم الله

يارب ألهمنا القدرة على التحمل والصبر الكروى، يارب خيب ظنون اللى بيحبو مصر وحاسين إن حلم مونديال 2010 راح.. بخ.. خلاص.. والعياذ بالله.
يارب وحياة حبيبك المصطفى، حاسب اللى نيموا أكثر من حاجة و80 مليون بنى آدم تسعدهم الكرة وحدها، فى غياب حقوق كتيرة.. فى حزن مضجع.
يارب عكنن على كل اللى عكنن على البسطاء اللى دفعوا أجر يوم على المقاهى لمشاهدة الفضائيات، والبحث عن حالة فرحة وشوية ابتسامة.. فانتهى بهم الأمر للنوم كمدا وتكديرا.
يارب نسألك الاستجابة.. كما نسأل كل المسئولين عن الفضيحة أن يتوكلوا عليك ويسمعونا «بودعك».. وهنقول لهم 160 مليون شكرا ونشلهم على أكتافنا، المهم يخرجوا بقى من دائرة كرة القدم المصرية.
لكل المتسببين فى الفضيحة نقول: استقيلوا فيمكن، أو ربما يرحمكم الله.. والله أعلم.
استقيلوا لأنكم قتلتم الكرة واختفيتم وراء بطولتين تحققتا بكل الإجراءات الاستثنائية وشق الأنفس، واللى كان بيقول لكم اللعبة منهارة كنتم تجروا وراه ب«شومة».. وتسلطوا عليه أبواقكم، رغم الفضائح التى بدأت ب«مقاومة» مشروع الجوهرى الإصلاحى لمجرد أنه لامس مصالحكم وبيزنسكم الكتير قوى على الآخر.. ربنا يديمه - وإن كنت أشك-!
استقيلوا بالتى هى أحسن واطلبوا المغفرة بعدد كل المفاسد التى حاصرتم بها اللعبة اللى الناس بتحبها وبتعشقها، استقيلوا، لأن قرار الإقالة جاهز ولن يرحمكم منه الدكتور أحمد فتحى سرور الذى ألصقتم به مباراة عمان إياها.. ولن يرحمكم أيضا أى مسئول تلجأون إليه لبث آراء خطأ عن الناس الوحشة إِخىِّ يا لهوى آيا، اللى بيقولوا عليكم أفسدتم الكرة وخلصتم عليها، ببساطة لأن كل من ستلجأون إليه، نام ليلة حزينة وانخدع فيكم.. ومش طايق يشوف حد منكم.
استقيلوا وكفاية ما حصلتم عليه، وهو كثير، ويضمن لكم بحساباتكم حياة رغدة سعيدة، بس مش رغدة الممثلة القديرة طبعا!
استقيلوا بدل ما تروحوا بشكول يسىء لشوية تاريخ يظهر انه انكتب صدفة!
استقيلوا.. وخدوا معاكم حتى الكاسين اللى بيتعيرونا بيهم.
استقيلوا لأنكم لم تقدموا جديدا ولن تقدموا، ده كفاية عدم مطالبتكم بخصخصة كرة القدم علشان تفضل الأندية غلابة ومستعدة لإعطاء الصوت بقروش بسيطة!
استقيلوا.. وكفاية ضحكتم الفيفا والكاف وكل الدنيا علينا.. فلا فيه تخطيط، ولا تنفيذ، ولا تجديد ولا ابتكار.
استقيلوا لأن كل شعب مصر سواء الجهات السيادية أو الشعبية، كانت صابرة على أفعالكم، لأن الناس فرحانة، والكورة بتنسيها كل هموم العيش والبنزين والسكر والدوا والسكن والمية وفيروس سى.. وأنا وأنتم، ولكن دلوقت مين يستحمل حالة الجمود اللى نشرتوها فى مزارع الجبلاية.
استقيلوا حتى يتفرغ كل منكم لبيزنسه.. وكفاية كده.. وبلاش فضائح، لأن المستور والمسكوت عنه قرب جدا جدا يظهر لوحده وبدون أى بحث أو محاولة كشف ما تحجبه ورقة توت متهالكة فى طريقكم الكروى.
استقيلوا.. وإلا فكل الملفات والحوارات والحسابات المؤجلة سيتم فتحها، لأن البلد دى مش ملك لكم لوحدكم.. والمؤكد أن هذه الليلة السوداء.. وضياع نصف حلم المونديال 2010 هو عودة للمحاكمة الشعبية على صفر المونديال.. اللى هيقام فى أفريقيا ولم تفز مصر -عارفين يعنى إيه مصر- بشرف تنظيمه - ودى مصيبة - لكن كمان مانروحش نلعب.. ياه.. دى هتكون المصيبة الأعظم.. هو انتم إيه مابتحسوش خالص.. طيب خافوا من دعوات الناس المصريين الطيبين.. مفهوووووووم.