عزل مرسى !

سؤال محتاج إجابة وبالعقل.. لو كان بعض اللى مش عاجبهم أداء الرئيس محمد مرسى بيقولوا نعمل حملة تمرد ونشيله!! يبقى على كدة أى رئيس قادم سياسته مش عاجبة بعض الناس هيقولوا لازم نعزله ومش هتبقى دولة؟!
النظم الديمقراطية بيكون فيها مؤيدين ومعارضين ونسبتهم غالبا بتكون متقاربة والجميع بيحتكم للصندوق، لكن إن النسبة اللى مرشحها خسر تقول لأ مش عايزينه ولازم يتعزل! طيب لو بالفرض هو اتعزل يبقى فى احتمالين:
1- إن اللى يمسك بعده يكون واحد من المعارضة وساعتها مؤيدين الرئيس اللى خسر هيعملوا زى اللى انتوا عملتوه ويقولوا لازم يتعزل وكل واحد من الجهتين عنده قدرة على الحشد ده غير إن فى جهات خارجية بتستغل الصراع السياسى بين الأحزاب والقوى السياسية والإعلام وجميع الأجهزة وتزرع الفتنة وتحشد تحت شعارات أغلبها وهمية..
2- ممكن اللى يكسب هو هو نفس الرئيس اللى اتعزل وساعتها المعارضة مش هتلاقى حاجة تقولها غير إن الانتخابات مزورة عشان طبعا تدارى على توقعاتها الخاطئة.. وهندخل فى نفس الدايرة تانى والحشد تانى وشعارات عزل الرئيس تانى! واللى بيتحمل نتيجة كل اللى بيحصل ده الشعب المصرى والطبقات الفقيرة اللى أنا متأكد إن محدش من السياسيين بيهتم بيها وكله يهموا بس إنه ياخد كرسى أو يبقى بطل إعلامى أو ماشى ورا فكرة ومخلص ليها أكتر من إخلاصه للوطن نفسه !
ياريت الكل يبطل سياسة اليومين دول ويبص شوية للبلد ولو كنت مش قادر تبنى البلد مع اللى بيبنوا يبقى لو سمحت بلاش تهدم اللى غيرك بيبنيه !