الشاعر أحمد فؤاد نجم: ندمان إنى عصرت الليمونة وإديت "مرسى" صوتى.. والإخوان ضربونى فى السجن وقالولى يا "زنديق".. و"قنديل" مينفعش غير "مُدرس عربى".. وأقول ل"الجنزورى": إلحق البلد قبل ما تغرق

أعرب الشاعر، أحمد فؤاد نجم، عن ندمه بعد أن "عصر على نفسه ليمونة" واختار الدكتور محمد مرسى، وأعطاه صوته فى الانتخابات الرئاسية.
وقال "نجم"، فى حوار أجرته معه الإعلامية، دينا عبدالرحمن، فى برنامج "زى الشمس"، على قناة "CBC"، أن رئيس الوزراء، الدكتور هشام قنديل، إنه لا يصلح إلا لمهنة "مُدرس عربى"، مناشداً الدكتور كمال الجنزورى، قائلاً: "إلحق البلد قبل ما تغرق".
وإليكم نص الحوار بالتفصيل..
دينا: الشاعر الكبير الذى لا هزمته السلطة ولا السنين سفير الفقرا والغلابة إللى كلامه زاد وزواد الثورة والثوار.. متفائل؟
نجم: طبعا.. الشعب المصرى ماماتش، والست المصرية تقوليلها صباح الخير تحمل.. مصر ولادة.
دينا: طب إيه هو بالعدد!
نجم: أمال أيه.. بالعدد من النوعية المصرية إللى جينات الحضارة فيه من سبعة آلاف سنة، أنا لفيت تلات اربع العالم وباشوف كويس، ورحت عشان اتفرج ولما أوصل أى حتة كنت أقولهم فرجونى على المدن الساحلية إللى عندكم، ما فيش مقارنة بينها وبين إسكندرية.. هى إسكندرية واحدة وبس.
دينا: ما تغيرتش مصر ماتغيروش المصريين؟
نجم: وماله لما يتغيروا دول بنى آدمين مش حجارة.. المهم بيرجع لأصله على طول.
دينا: أمال بتدخل إزاى على "تويتر" و"الفيس بوك" وبتكتب تعليقاتك وأشعارك؟
نجم: مش بتاعتى.
دينا: أمال قصيدة "سيادة المخلوع ارجعلنا" شفتها ؟ عجبتك؟
نجم: أوى.. هما بيستخبوا فيا.. وانا فى روحى فرحان أوى بيهم أنا أبوهم.
دينا: ما فكرتش تعرف هما مين؟
نجم: أنا مش عايز اعرفهم أنا كده فرحان بيهم.. أنا أبوهم الشجرة بتطرح أهه يا بختى وهناى.
دينا: سمعت أغنيته "يا مصر هانت وبانت"؟
نجم : آه عجبتنى أوى بتاعت "تميم البرغوتى".. ده ابنى برضه.
دينا: كان فى عهد السادات انت اتسجنت فى عهده 9 سنين، وفى عهد عبد الناصر 9 سنين برضه؟
نجم : آه
دينا: وزاملت الإخوان المسلمين والمهندس خيرت الشاطر ؟
نجم: طبعا أعرفهم كلهم دول حبايبى أنا مرة دخلت إضراب عشانهم لما ضربوهم علقة موت لسبب تافه.. وسرًقٌوهم فى ربع فرخة.. فجابولهم العيال الدرجة التانية عجنوهم.. والظابط قال لى أنت مالك حد عملك حاجة ليه بتضرب.. قلتله أنا بنى آدم يا أخى.. وجالى محمد قطب أخو سيد قطب مع الشيخ كشك علشان أفض إضرابى.. وقال لى إحنا اتصالحنا مع إدارة السجن.. فقلتلهم إنتوا إتصالحتوا مع الإدارة لكن أنا مُضرب، شتمونى وقالوا لى إمشى يا زنديق.
دينا: هل ندمت على تضامنك معاهم و بعد عصرك ل"اللمون"؟
نجم: ندمت على إنى أديت صوتى لمرسى لما قال دم الشهداء فى رقبتى.. قلت وماله أديته صوتى على طول.
دينا: لو رجع الزمن حتعدل اختيارك؟
نجم : لو نزل "مرسى" قدام إبليس هانتخب "إبليس"
دينا: شايف "الجماعة" بتتدخل فى كل القرارت؟
نجم: وبغشم، مش مصدقين نفسهم إنهم بيحكموا مصر.. مصر مش زيمبابوى
دينا: وجود الرئيس مرسى فى السلطة لوحده مع مستشارين أَكفَاء ممكن يكون يكون أفضل؟
نجم: أنا عندى مبادرة بقولها من برنامجك، باقول لصديقى العزيز إللى حينقذنا من رئيس الوزراء اللى ما ينفعش غير "مدرس عربى".. حبيبى، كمال الجنزورى، إلحق مصر.. مصر بتغرق.
دينا: النهاردة فيه المتفائل رغم الصعاب وناس عندها إحباط وعندها إحساس إن الثورة اتسرقت منهم.. شايف الثورة اتسرقت؟
نجم: الثورة ما تتسرقش مادام مع الشباب هما سرقوا الكراسى.. بس الشباب مستنى الشعارات تتحقق العيش والحرية والعدالة الاجتماعية.
دينا: فى مليونية تطهير القضاء شفنا مشايخ وملتحين بيضربوا واحد بس وضرب صعب
نجم: أيوة
دينا: بس فيه ناس بتقول فيه حرية والرئيس قال ما فيش بلد فى الدنيا فيها حرية زى مصر.. حرية الإعلام حرية الكلام؟
نجم: حرية إيه؟، هو يقدر يعمل أى حاجة لأى حد؟.
دينا: لا ما هو فيه ضبط وإحضار
نجم: هاتيلى ضبط وإحضار.. نوارة بنتى قالت مش رايحة
دينا: بتحب باسم يوسف؟؟
نجم: أوى، متابعه من أول ما ظهر قبل البرنامج بتاعه.. كان بيطلع على "أون تى فى".. وشايف إنو شكل جديد للإعلام المتحضر، (بحبه أوى).