شوفتوا مبارك

وهو بيبتسم وبيشاور بأيديه
وكأن الثورة قامت علينا مش عليه
والله ما أنا عارف أقول أيه
أكيد وكالات الأنباء العالمية
هاتتكلم وتفسر القضية
وكل القنوات الفضائية
هاتتكلم عن ابتسامة مبارك
دا أكيد من تأثير النهضة
اللى ظاهرة وبينه فى عنيه
صدقونى مش عارف أقول أية
وأرجع وأقول البركة فى الإخوان
بسببهم بقى مبارك مبسوط وفرحان
ناقص يشقلط كمان
والعجيب أنه بيشاور بأيديه
أه يا ابن الأيه
وكأنك ضد الموت
وضد الحبس وضد الكسر
وحتى وأنت متهم حاسس بالنصر
أنا نفسى أفهم هو فيه إيه؟
ياريت يا مرسى أنت اللى تقولنا هو فى إيه؟
وإيه اللى حصل وليه؟
مبارك كان عامل ميت
ويمكن كمان مات تلت أربع مرات
أنا عارف إن كلها إشاعات
وكمان كان بيستخبى فى عياله
وكان ربنا عالم بحاله
أنا عارف أن كان كله تمثيل فى تمثيل
وعارف كمان أنه ممثل قديم
وياما طلع علينا القديم والجديد
وكل اللى عمله
إنه قسم البلد أسياد وعبيد
بس النهاردة حاسس أنه فى عيد
مش فى محاكمة وفى قفص حديد
ربنا ينتقم منك يا بعيد
ياترى إيه غير حاله وحاسس بالنصر ليه؟
هو فاكر نفسه صلاح الدين
بس أرجع وأقول الحق مش عليه
الحق اللى بقينا فيه
مين اللى قال إن مبارك مسجون
أحنا اللى مسجونين
مين اللى قال إن مبارك متهم
إحنا اللى متهمين
أنا عايز واحد فى البلد
يقولى البلد دى رايحة فين؟؟؟؟
وهى بلد مين