يا عم يا مراكبى

الموج عالى غضبان
المجدافين فى إيديك زى كفة الميزان
سم بسم الله الواحد القادر الرحمن
إحنا معاك فوق الموج ضد القرصان
قلوبنا فى الحق حجر بازلت صوان
جدف بنا نوصل بسلام لشط الأمان
***
يا عم يا مراكبى دخلت علينا غربان
المركب حل عليها الظلام وجرزان
أخرج قول لنا خطة عمل فى بيان
إحنا سوا نجدف مفيش منا غفلان
الخير حوالينا وإحنا منه فى حرمان
الميه بين إيدينا القلب لها عطشان
***
يا عم يا مراكبى الموج سرق الأمان
الخوف كسر المجداف بقى خسران
أيادينا لسه مفتولة مشتاقة للبنيان
من بحرنا نجمع سوا لؤلؤ ومرجان
خلينا نجدف وأنت بالدفة لنا ربان
نحمى السفينة من الحوت والتعبان
***
يا عم يا مراكبى اعزف قول لنا ألحان
نبنى بها السفينة نحميها من التلفان
بلاش صمتك يطول العقل منك حيران
تعالى نحمل مركبنا تصديرات للبلدان
ولا إيدينا نمدها أبدا لفلان أو علان
يا عمنا شد حبل القلع نوصل العمران
***
يا عم يا مراكبى امسك الدفة زى زمان
حكمة إيد حديد جرأة تحارب الفسدان
السفينة يعلو نورها توصل لبر أمان
زى سفينة نوح منها عاشت الأكوان
حتى ابنه غير صالح تركه فى الغرقان
مصر سفينة هدية محفوظة فى القرآن
***
يا عم يا مراكبى سفينتنا للمجد عنوان
جددها وحدها احميها بحكمة الفرسان
حقق ادخلوا مصر بسلام كمان وأمان
يدخل علينا الخير ما يبقى فينا حرمان
نور الفنارة حكمتك تنور لنا الشطآن
أحقق بها عيش حرية كرامة الإنسان
***