تَعالوا معَايا نِفَكرْ صَحْ

علشان مصر
تعالوا معايا نفكر صح
مصر الباقية ومصر أهم
مصر دايما شايلة الهم
مصر جموع لشعب كبير
قام يطالب بالتغيير
يبقى عشان يتقدم خطوة
وللاعشان يتحرق الدم
.........................
لو كان عندك أرض وبيت
أو فلاح وبتزرع غيط
أو غلبان مش لاقى اللقمة
كل حياتك فى رغيف عيش
البيت كله عليه يِتْلَمْ
وللا يَدُوب وبدأت العوم
ولقيت نفسك وسط البحر
بتغرق فيه
ولا فيش حد بينقذ فيك
ولا فيش حد جرى واهتم
قولى هتعمل إيه وتعيش
وللا العيشة كمان ماتهمك
ولا بالك مشغول بالييت
ولا بالابن ولا بالخال ولا بالعم
................................
تعالى معايا نفكر صح
خللى مكانك فى مكان مصر
وإوعى تقول فهلوى ومعلم
ومفيش زيى لأبد الدهر
وإوعى تكون م الحزب إياه
فاكرها جوازه
ومصر بحالها ما تنفع مهر
وإوعى تكون ثورجى وورثت
وتطلب حقك بحر ونهر
وإوعى تقول دا أنا ليا شهيد
وهبيع دمه وأطلب فدية
وكام شغلانة وعلاوة شهر
وإوعى تكون من حزب الكلمة
كله كلام فى كلام للصبح
وقت البُنَا والشغل الجد
تهرب تجرى ولا فيك فايدة
وبلدك حتى تموت م القهر
............................
تعالى معايا نفكر صح
علشان مصر
...........................
إحنا سوا وسط البحر مابين شطين
ومفيش مركب وللا سفينة
يبقى نجدف سوا بإيدينا
لحد ما نوصل عند الشط
ونرسم بينى وبينك خط
إنت فى ناحية
وأنا وياك م الناحية التانية
هييجى الشط ساعتها فى ثانية
وإلا هنغرق سوا ونموت
ومالناش ذكر وتنسى الدنيا
..............................
تعالى معايا نفكر صح
علشان مصر
..............................
آدى حكاية مصر الثورة وبعد الثورة
قلنا خلاص راحوا الفسدة
وراحوا الظلمة ودارت الدورة
هنبدأ بقى ونفوق م الظلم
وخيرنا هيرجع لينا ونعيش
وشهور بنغنى
للثورة البيضا والثورة الطاهرة
ومصر هتولد فرخة بريش
وإللى ماكنش يلاقى رغيف
جاى بيقول لها هاتى ياميش
ونحكى نقول عن إيد واحدة
وصورة الشعب ويا الجيش
وسط ميدان محفورة للذكرى
ألف خسارة
كأن الثورة لسه فى حلم
أسوأ صورة وأسود فكرة
الكل يهمه مصالحه وبس
وننسى الشهدا ولا فيه حكمة
ولا قالوا علما ولا فيه علم
ولا فيه شغل ولا فيه سلم
ولا فيه مصر و لا فيه بكرة
...............................
تعالوا معايا نفكر صح
علشان مصر
............................
مفيش مستقبل من غير شغل
ومفيش لقمة من غير إنتاج
ومفيش خير من غير زرع
والمولود لسه صغير
بيته إزاز أوبيت من صاج
وأى شوية ريح بتطير
ولا يمكن هتعيش بمزاج
ولا يمكن فى شهور يتغير
ونقول ألماظ ونقول عاج
لازم نتعب ولازم نصبر
علشان نوصل
وإللى فى نفسه يروح الجنة
غاوى عبادة
يقيم الليل وللا يصلى
وللا وقت الصلاة بيهج
وإللى بيحلم يوم بالكعبة
يقعد جوة البيت ويحج
وللا يسافر ويروح مكة
وللا الحج من غير حجاج
يبقى الجنة عاوزة الزرعة
وإحنا الزرعة وإحنا حصادها
وإحنا ولادها إللى قصادها
ومصر الملكة ناقصها التاج
وتاج الملكة فى قلوب واحدة
وقلوب طاهرة
مش فى كلام ومش فى مظاهرة
تعالوا معايا نفكر صح
علشان مصر
مصر الحرة