شلاليت!

نفسي أقول كلمه وخايف تزعلوا
إنتو ليه ساكتين على اللي طبلوا
وكل حبه يرقصوا ويهللوا..
أصلهم فاكرين في يوم راح يوصلوا
كدابين الزفة راحوا كدابين الزفة جُمْ
كدابين الزفة رجعوا كدابين الزفة أَهُمْ
كلهم عميان ومش فاهمين وصُمْ
شكلهم في كل حته ياناس يغَمْ
كدابين الزفة عالم معروفين
كل حبه في التظاهر رقاصين
اللي يدفع يبقوا عنده خدامين
والجنيه هو المفضل والمعين
ياهواة الرقص فوقوا.. الشعب فاق
كله عايش في الحقيقة وباتفاق
إن صوت الشعب فوق صوت الفراق
يبقي مين فينا اللي يكسب في السباق
صدقوني اللعبة ظهرت للجميع
وانكشف دور اللي بيقود القطيع
والضحية في الصراع هو المطيع
واللي مش عايز أقوله شيء فظيع
أفتكر المخدوعين فهموا الحكاية
لما عرفوا اللعبة دايره م البداية
بين جماعة محتاجين ضرب العصاية
كلهم بيحبوا يبقوا في المراية