"خريطة التحرش" تنشر شهادة إحدى الضحايا

قامت مبادرة "خريطة التحرش الجنسى"، اليوم، بنشر شهادة إحدى الفتيات تعرضت للتحرش الجنسى واستطاعت التصدى للمتحرش، جاء ذلك ضمن حملة "مش ساكتة" التي أطلقتها المبادرة للقضاء على هذه الظاهرة المنتشرة في المجتمع المصرى.
نص الشهادة:
موقف حصلي.. كنت راكبة ميكروباس وحطيت على رجلي شنطة كبيرة اللي هي بعجل دي علشان ماكنش ليها مكان فوق العربية.. جه واحد قعد جنبي وبعد شوية بيقولي أنا دراعي منمل أوي ممكن أسنده ع الشنطة بتاعة حضرتك.. قلت له اتفضل...
بعدين أنا غمضت عنيا "مانمتش" وسندت ع الأزاز لاقيته بيمد إيده على صدري رحت ضارباه بالألم وقولت بيتحرش بيا والله مد إيده عليا.. قال البت دي كدابة وشتم شتيمة وحشة ورحت قايلاله أنا أشرف منك ومن عشرة زيك وجيت أبعده عني لاقيته مسك إيديا الاتنين بقوة فظيييييعة وبيزقني ناحية الشباك بعدين الراجل اللي جنبه راح مبدل معاه المكان.. وهو قعد يقول انتي عايزه يتعمل فيكي كدة وأنا قعدت أعيط.
جيت أتصل على ماما الموبايل بتاعي فصل شحن طلبت من اللي جنبي مكالمة وقولت لماما قالتلي هبعتلك أخوك "أنا بابايا ومامتي منفصلين " المهم هو بقى جه نزل قبل الموقف.. نزلت وراه وسبت الشنطة واللاب في العربية وخربشته في وشه وكعبلته وقعته ع الأرض وضربته برجلي وكنت بضرب فيه بافترا فعلا ونزلوا الرجالة اللي في الميكروباص اللي بشنبات بيبعدوني عنه بس أنا مارتحتش إلا لما لاقيته وشه كله دم، إثر خربشتي ليه.. بس بردو أنا زعلانة إن هما دول رجالة بلدي لما أصرخ وأصوت في الميكروباص وأقول ده مد إيده عليا ده اتحرش بيا ولا حد منهم يتهز ولا ينطق وكانوا سامعينه وهو بيقول عليا أن أنا عايزة يتعمل فيا كدة !!
للعلم أنا كنت لابسة فيست طويل لتحت الركبة وواسع وكنت لابسة طرحة علشان الناس اللي هتقول لبسك هو اللي مكانش تمام !