"دى بلادى" شعر ل"وليد ناصف"

دي بلادي
ودول ولادي
سطر يا تاريخ
كيد الأعادي
عرف أي عدو
عرف كل حبيب
حجم الإخوان
في بلادي
ثورة شباب جدعان
ثوره بدون إخوان
فيها بنات وشباب
دايبين في حب بلادي
ما فيش سجين هربان
ولا جمل ولا جمال
ولا فكر لأمريكان
ولا سنجه في الأيادي
دي بلادي
ودول ولادي
سطر يا تاريخ
كيد الأعادي
ثورة مفهاش مكان
لمنصه ولا سلطان
مهما موزة تهاتي
مهما الجزيرة تنادي
فيها النيل فرحان
حاسس بالأمان
محمي بالإعلام
وبنبض قلوب ولادي
دي شوارع من لحم ودم
وشعب بارع في الانتصار
تشوف عيونهم مليان هم
بس رفضه الانكسار
لما مصر تنتفض
تبقى سيل م البشر
والحاكم مهما يكبر
في لحظه يبقى في حصار
اكتب يا تاريخ لبكرة
أعظم قصه غرام
بين الشعب وبهية
عشان يعرفوها ولادي
دي بلادي
دول ولادي
سطر يا تاريخ
كيد الأعادي
العلم للبنات طرحه
مكياج فوق الخدود
قطن وشاش للجارحة
أسد زي الجنود
أرض الفيروز أبية
في الحزن متجلية
ترقص فوق القنابل
أصلها في الكتاب محمية
ابن العاص جهزها
للإسلام جوزها
مُحمد شكر قبطيها
وحد فيها الأيادي
دي بلادي
دول ولادي
سطر يا تاريخ
كيد الأعادي
شعب راسم براءته
بريشه ع الحيطان
وشماريخ في السما
وخضره في الغيطان
بدمعه وقت الفرحة
تتصدى للرمال
بمسلم ويا قبطي
وصليب في حضن هلال
بوقفه ضد داعر
نفسه يشل الأيادي
ووقفه ويا شاعر
تسلم الأيادي
دي بلادي
دول ولادي
سطر يا تاريخ
كيد الأعادي