فاكرين تهامي باشا عم الإنتاج السينمائي في مصر ووديع اللي كان بينفذ أوامر الباشا في كل حاجة.. وأخيرًا فهمت يا وديع والكلام ده.. يوم ما جاب له فيلم عن الخطايا السبعة ومؤلفه مريض نفسي شوية وكان بطل الفيلم بيقتل الناس عشان الخطايا السبعة ووديع بيقول لتهامي باشا: إن مشهد النهاية مش هتصدقه وينده على الممثلين ويقولهم جاهزين يا أساتذة.. المشهد كان لتلاتة، ظابط ماسك مسدس ومجنون عمال يطلع لسانه ويضحك بهستيريا وواحد واقف في النص شكله محلل ولا إيه وعمال يصرخ في الظابط ويقوله هو عايزك تقتله.. هو عايزك تقتله. مظاهرات أنصار الرئيس المعزول وحرصهم على الاحتكاك بالشرطة واستفزازهم مش عارف ليه فكرتني بالإعلان ده والكل فاهم وعارف إنه خارج عشان عايزك تقتله.. والجزيرة «المحلل» جاهزة للتصوير اتقتل أنت بس والباقي عليها هتقوم بالواجب.. وهطلعك عديم الإنسانية ومجرم عشان بتقتل إرهابي سلمي معهوش غير سلاح آلي.. فعلًا أنت معدوم الضمير لما تواجه السلمية المسلحة دي بالقتل.. عادي يعني ومتستغربش أي حاجة من الجزيرة لما متصل بيها يقول للمذيع: يا بيه قتلونا واحنا بنقتحم القسم عشان نخلص زملاءنا اللي الأمن قبض عليهم عشان معاهم سلاح يبقى أنت عايز إيه تاني.. دا إنتاج مصري خالص.. فعلا المصري.. أم الأجنبي وسلملي على تهامي باشا.