لحد أمتى؟!

لحد امتى هتلاقى ناس ساكتة عن الحقيقة؟
لحد امتى هتلاقى ناس بتضيع كل لحظة وكل دقيقة؟
في خوف وآلام ومصالح تافهة وحقيرة ؟!
لحد امتى الناس بيقطعوا بعض على الفلوس
لحد امتى تمشى تشوف أسوأ ما في النفوس
لحد امتى الناس هتكره بعض وتحقد ؟
لحد امتى الدنيا عماله تفرق في البشر وتبعد؟
لحد امتى الرحمة انعدمت من قلوب الناس؟
لحد امتى الضعيف هيفضل مذلول ومحتاس؟
لحد امتى هتفضل الكوسة في البلد هي السمة والأساس
انعدمت كلمة الحب وأنا شايلك على دماغى يا تاج الرأس
كلمة صباح الخير، مساء الخير أو حتى الباسمة
حب الدنيا والنظرة ليها بعيون جميلة وحسنة
العالم فينا مهمل ومركون
أصل علمه مش مناسب للى محتاجه (الزبون )
أصل أهم حاجة في الدنيا هستفيد كام وقد إيه
مش مهم بقى اللى بعمله صح ولا لا.. المهم يساوى كام جنيه
فين كرم الناس والمجاملة والضحكة الحلوة ؟
اللى بتطلع من القلب وترن فيه زى الغنوة
وشوش صافية وقلوب دافية مليانة بالحب
قلوب بتحس بالغرب زى القرب
كلمة الصدق هي عنوان المحبة
والوفاء هو سر الحكاية والقصة
الخوف من بكرة مش موجود عارف ليه؟
لأن بكرة ده مش بأيدينا لكن في إيديه
التوكل وكلمة (خليها على الله)
كلمة اشتغل وسيبها والله هتحل البركة
كلمة الدنيا مش ماشبة 1+1=2 وخلاص
لا فيه جو من الحوار والتفاهم بين الناس
كفاية بقى صراع وخناق ليل ونهااار
على أتفه الأسباب بجد خليتو الواحد يحتاااااار
ماشى أنا مش عارف فين الصح من الغلط
أو مين اللى نثق فيهم ونحبهم بجد
ماشى أنا محتار في تركيبة البشر
ومش لاقى الأشخاص اللى فيهم الثقة وهما السند
اصحوا بقى وفوقوا يا بشر
كفاية بقى حيرة وتوهان وخوف من القدر
ليه محتاس كدة وتعبان على طول؟
ليه بتفكر بس إزاى أنت توصل تطووول؟
تطول اللمعة وتكون قوى ومشهور
حلو،جميل، أحلم وأتمنى
عيش في السعادة وأتامل وأتهنى
بس لازم وانت بتفكر في الدنيا تتذكر الجنة
طيب يعنى أنت هتوصل كدة بسهولة للجنة؟
لااا...لازم كدة بقى يكون فيه وقفة
وقفة مع نفسك واسكت سكتة
اقعد مع نفسك وراجع حساباتك
بس وأنت بتفكر حاول تنسى إهاتك
فكر بعقل عملى وراجح
فكر إزاى تكون إنسان وتصالح
نفسك واللى حوليك وقبل كل ده ربك
صدقنى هيفرح أوى بيك وهيكون واقف جنبك
بس أنت سيب نفسك ليه وهترتااح
وبطل يا ابن آدم تلهد ورا الدنيا وتنسى الآخرة وهي الأساس..

Dr/yasmina mohamed shaheen