كنباوى وكنباوية.. حلقة رقم (109).. عيد سعيد وثورة حمرا !

التليفزيون في منزل كنباوية يذيع الأغاني ابتهاجا بقدوم عيد الفطر وكل القنوات تقوم بعمل حوارات ومقابلات مع الفنانين للتهنئة بعيد الفطر وكنباوية تقوم بنظافة الشقة تساعدها ابنتها شلتة وكنباوي يقف مراقبا لها حيث بات في قلق عليها منذ أن علم بحملها وثومة تصدح بصوتها الجميل: يا ليلة العيد آنستينا وجددتى الأمل فينا.
كنباوية: انزل انت يا كنباوي: روح الفرن زمان صاجات الكعك والبسكوت طلعت وهات معاك عيلين من الفرن يشيلولك الصاجات وابقى اديهم اللي يطلع من ذمتك وكل سنة وانت طيب.
كنباوي: وانتي طيبة يا كنباوية بس أنا مش نازل إلا لما انتي تخلصي شغل في الشقة علشان اطمن عليكي انك مش حتتعبي نفسك.
كنباوية: ما تقلقش عليا يا كنباوي أنا كويسة ولو حسيت بأي تعب حخلي شلتة تكمل نضافة الشقة وأنا حقعد أرتاح وبعدين خلاص احنا قربنا نخلص واللي يشوف كده يقول إني أول مرة أكون حامل!.
كنباوي: لا ماقلناش أول مرة بس الاحتياط واجب واللي في بطنك له عليكي حق الراحة.
كنباوية: ما أنا مريحاه على الآخر بس انت اطمن واهدي وانزل هات الكعك والبسكوت من الفرن.
كنباوي: حاضر يا كنباوية بس قوليلي انتي سمعتي البلتاجي قال إيه؟.
كنباوية: قال إيه ؟ مشش في ركبة ها نقصاه على العيد ده راجل مقرف ومزعج أنا عارفة أهله مستحملين رزالته إزاي الله يكون في عون أهله.
كنباوي: قال إنه حيقوم بثورة بعد العيد علشان يرجع الحكم تاني للإخوان ويرجع الشرعية ومرسي.

كنباوية: ثورة ؟.
كنباوي: أيوة ثورة، هو قال وصرح بكده من فوق منصة رابعة العدوية.
كنباوية: وماحدش قال له ثورتك حمرا ؟.
كنباوي: لأ ماحدش قال له.
كنباوية: خلاص يبقى أنا أول واحدة أقولها له يا بلتاجي ثورتك حمرا.
كنباوي: الله يحظك يا كنباوية ضحكتيني.
كنباوي: ده بيقول للناس في رابعة إنه رئيس الجمهورية المؤقت لحين خروج مرسي.
كنباوية: مؤقت إيه ابن الموقتة ده يمكن قصده على جمهورية رابعة خلاص يطلع بيان استقالال إشارة رابعة العدوية عن جمهورية مصر العربية خلي السيسي ينفخه.
كنباوي: يابنتي كده كده السيسي حينفخه هو وصفوت حجازي بعد العيد أصل خلاص صبر الجيش نفد وصبر الداخلية كمان نفد لأنهم خلوها خل دول جابوا صواريخ هاون في رابعة وصواريخ مضادة للطيارات وبيقولوا إن معاهم كمان أسلحة كيماوية.
كنباوية: مش ناويين كمان يعملوا مفاعل نووي في رابعة.
كنباوي: بيقولوا حيعملوا لو القعدة طولت شوية.
كنباوية: أنا سامعة أنهم بيعملوا كمان نفق زي فيلم الهروب الكبير علشان ساعة الخطر يهربوا منه البلتاجي وصفوت حجازي والمرشد ويضحوا بالباقي.
كنباوي: انتي عارفة الحسنة الوحيدة اللي عملوها إيه؟.
كنباوية: إيه يا كنباوي؟.
كنباوي: إنهم ما خلوش ولا شحات في البلد لموا كل الشحاتين اللي في البلد علشان يكتر عددهم وودوهم اعتصام رابعة مقابل أكلهم وشربهم وفلوس كمان كل شحات بياخد في اليوم 150 جنيها واكل شارب نايم قايم قابض ومحلي كمان بقى من عند لابوار ما يرحش ليه ده فيه شحاتين راحوا يكونوا نفسهم هناك شوية وحيرجعوا.
أصل البلتاجي عمل عقود عمل لمعتصمي رابعة زي عقود شركات إلحاق العمالة بالخارج بس دي إلحاق عمالة بالداخل داخل رابعة العدوية وميدان النهضة.
كنباوية: يعني الإخوان لموا الشحاتين وأطفال الشوارع وأطفال الملاجئ الأيتام ونسوان المناطق التعبانة وعمال تراحيل الأرياف والصعيد إيه القرف ده؟.
كنباوي: يعني انتي كنتي منتظرة من الإخوان يلموا مين في اعتصاماتهم قناصل دول وسفرا ودكاترة جامعة؟.
كنباوية: على رأيك دول مشمومين ودول مقامهم والطيور على أشكالها تقع.
كنباوي: قصدك الغربان على أشكالها تقع كفاية كلام عنهم بتجيني قرفة وسدة نفس خليني أنزل أجيب الكعك من الفرن وكل سنة وانتي طيبة يا كنباوية.
كنباوية: وانت طيب يا كنباوي وانت طيب ويعود عليك وعلينا الأيام بخير!.