كنباوي وكنباوية.. حلقه رقم (94).. تطهير سيناء من البؤر الإرهابية

"كنباوية" غير متواجدة بالمنزل، و"كنباوي" يسأل "كنبة" و"شلته" عنها فيجيبانه أنها فوق السطوح مع مجموعة من النسوة من أهالي الحارة والحواري التي بجوارهم تقوم بإعطائهم دروسا في السياسة لمحو أميتهم السياسية، فيبتسم ويستفسر عن طعام الإفطار.. هل قامت بتحضيره قبل الصعود لإلقاء الدرس أم لا ؟.. فتجيبه "شلته"، إن والدتها صنعت الطعام قبل الصعود دقائق ويسمع "كنباوي" صوت النسوة وضجيجهم على سلم البيت وهن يهبطن من فوق وتدخل كنباوية من باب الشقة فيستقبلها كنباوي ببسمة
كنباوي: أهلا بالست الناظرة
كنباوية: بطل تريقة
كنباوي: أنا مش بتريق بس يارب يجي تعبك بفايدة
كنباوية: أنا بعمل اللي عليا والباقي على ربنا واهة الواحد ياخد فيهم ثواب ولازم البلد كلها تعرف اللي ليها واللي عليها علشان مانوقعش في غلطة اختيار رئيس فاشل تاني
كنباوي: عندك حق كفايانا بقي جهل سياسي ماهو اللي ودانا في داهية قبل كدة
كنباوية: وأي داهية ياكنباوي ! ما ادينا اهة بندفع التمن تمن اختيارنا لجماعة إرهابية تحكمنا اهة دلوقتي لما شلناها بتطلعه على دماغنا وآديك شفتهم امبارح كانوا عاملين جمعة الزحف وشكلها مش حتخلص.
كنباوي: دول بيقولوا انهم حيعملوا أفران في رابعة العدوية علشان يعملوا كعك العيد
كنباوية: يارب العيد يجي ما يلاقيهم.. عيد اية المجانين دول
كنباوي: دة صفوت حجازى هو اللي صرح بكدة
كنباوية: بقي الجيش مش عارف يقبض عليه هو والبلتاجي ويرحمنا من قرفهم وأقوالهم ؟
كنباوي: ماهمه مستخبين في التظاهر ومش راضين يخرجوا والجيش مش عاوز يغامر ويدخل ياخده من وسطهم لأن ساعتها حتحصل مواجهات بين الجيش والشرطة وأنصار سي مرسي
كنباوية: خلاص بكرة يزهقوا ويخرجوا وساعتها يبقي الجيش يقبض عليهم ويعلمهم الأدب
كنباوي: إسرائيل وافقت تعلق معاهدة كامب ديفيد علشان تسمح للجيش أنه يبعت قوات تطهر جبل الحلال من البؤر الإخوانية والإرهابية اللي هناك واهة كله مصلحة ليها لأن البؤر دي بتهدد أمنها
كنباوية: أنا شوفت مدرعات الجيش وهي في طريقها لسينا على النت
كنباوي: أمريكا بعتت مقاتلات لمصر وطيارات مقاتلة اف 16 كدة يبقي هي رضيت بالأمر الواقع وسلمت بزوال حكم الإخوان
كنباوية: ماهي كان لازم تعمل كده لأن الشعب هو اللي اختار ماكنش ينفع أن أمريكا تقف ضد إرادة الشعب
كنباوي: والشعب خلاص قال كلمته لا للإخوان ومرسي
كنباوية: طيب والموكوسين اللي قاعدين في رابعة حنعمل معاهم إية؟
كنباوي: العمل عمل ربنا
كنباوية: أنا قلقانة من مبادرات التصالح الوطني اللي السياسيين بيتكلموا عنها دول ماينفعش حد يآمن لهم تاني دول غدارين ومالهمش أمان
كنباوي: ومين سمعك دول خونة
كنباوية: طيب وبعدين أنا شايفة أنة لازم السيسي يتصرف ويضرب بيد من حديد على المتظاهرين دول كفاية بقي عطلة ووقف حال البلد اكتر من كدة الناس تعبت دي نص شوارع مصر الجديدة مقفولة وزيها شوارع مدينة نصر اية حنقفل البلد علشان خاطرهم
كنباوي: بصراحة خلوها خل وسي القرضاوي سخنهم بفتاويه المدفوعة التمن مقدما
كنباوية: ما هو أكيد قطر اللي وزته يفتي بكدة ماهي خسرت كتير بزوال حكم الإخوان
كنباوي: اة ماهي كدة مشاريعها في مصر باظت خلاص كانت عايزة تحط ايدها على قناة السويس
كنباوية: سويس في عينها دي بلد سو هي وقناة الجزيرة بتاعتها
كنباوي: دي بتزيف الحقايق وبتقلب الأمور وبتبلبل الشعب المصري
كنباوية: المفروض القناة دي تقفل ماينفعش تستمر ابدا دي فتنة في البلد
كنباوي: يلا قومي حضري الفطار القرآن ابتدي
كنباوية: حاضر ياكنباوي أنا قايمة اهة أعملك قمر الدين ولا خشاف ؟
كنباوي: اعملي الاتنين
كنباوية: حاضر ياكنباوي حعملك الاتنين وحعملك تمر هندي سريع كمان أنا عارفة أنك بتحبه
كنباوي: شكرا ياغالية
كنباوية: انا عارفة أن الواحد وهو صايم بيبقي فاكر نفسه حياكل الدنيا بحالها ويشرب مية البحر وأول ما يفطر وياكل لقمتين بيلاقي نفسه شبع وقال الحمد لله
كنباوي: عندك حق بس الواحد بيحب أن الأكل يبقي كتير والشرب كتير أهة عادة اتعودنا عليها والسلام
كنباوية: ربنا ما يقطع لك عادة وكل رمضان وانت بخير وصحة ياكنباوي
كنباوي: وانت بخير ياكنباوية !