نجيب ساويرس: أول مكسب عملته كان من "البلي".. ومش بحب ألمع نفسي (فيديو)

قال رجل الأعمال المهندس نجيب ساويرس: "لو عملت فيلم سينمائي هاعمله عن والدي، ودي الحاجة الوحيدة اللى ممكن أعملها.. إنما مش بحب فكرة ألمع نفسي، وعنوانه يبقى ماي لايف ماي رولز".

سر تأجيل مهرجان الجونة السينمائي
وتابع خلال لقائه مع الإعلامية ناية تويني: "الظروف هي اللى أجلت دورة مهرجان الجونة السينمائي، والناس وضعها مش كويس والمهرجان دايما عليه هجوم غير مبرر وسطحي، وهناك عوائق كتير بتتحط، والحقيقة أنا عن نفسي لقيت الناس في حالة اقتصادية تعبانة دلوقتي ومش وقتي نبهرج دلوقتي، وزهقت من الهجوم الموجه".

تعليق قوي لنجيب ساويرس عن أزمة هاني شاكر
وعن أزمته مع نقيب الموسيقيين السابق هاني شاكر، علق: "هو مقتنع إنه بما انه النقيب لازم نسمع المغنيين اللى بيحبهم، يعني لو هو بيحب فريد الأطرش وعبد الحليم يبقى احنا لازم نسمعهم، اما حمو بيكا وحسن شاكوش ومحمد رمضان إزاي تسمعهوهم، وانا بقول له إنت مالك؟! إنت نقيب فنانين ترعاهم صحيا اجتماعيا وتشوف ايه اللى محتاجينه وتطلع التصاريح اللى بتطلعها بالمزاج.. إنما متتحكمش في ذوقي اسمع مين ومسمعش مين".

هل سيقام مهرجان الجونة السينمائية في 2023
وأكد: "إن شاء الله هيقام مهرجان الجونة السينمائي في 2023، بس يكون الوضع في مصر مناسب، بس أخويا ابتدا ياخد دور أكبر فيه".

بداية نجيب ساويرس في عالم البيزنس
وعن بداية تجربة البيزنس، علق: "انا كنت بلعب بلي في النادي واحنا صغيرين وكنت بكسب كتير أوي وبعدين أبيعه للولاد وآخد الفلوس وكنت بلعب كويس اوي، وأرجع البيت وانا طفل عمره 10 سنين معايا 5 و10 جنيه وفلوس كتير بكسبها، وقتها بدأت أحس بالعملية بتاعت الربحية، وأول ديل عملته في حياتي وانا بدرس برة، لقيتهم بيبعوا مجوهرات رخيصة فأنا قلت حاجات خان الخليلي ببلاش، وبدأت آخدها واقعد في الشارع برة مصر، وانا مسافر الصيف واقعد في الشارع واحط فوطة سودة ييجي واحد اسباني أبيع له جعران ب20 فرنك، وهو مكلفني مثلا تعريفة أو قرش، فعملت فلوس كتيرة جدا، وبعدين تطورت وقلت بدل ما اقعد في الشارع وييجي البوليس يقبض عليا علشان مش معايا تصاريح وألم الحاجة وأجري وأخبيها في الأمانات، وفي ألمانيا دخلت الزنزانة ساعتين لإن ممنوع نبيع من غير رخصة، بقيت آخد الحاجة من مصر وابيعها للمحلات الكبيرة في ألمانيا ومولت دراستي اول سنتين تلاتة بالتجارة دي، وقتها حسيت بعملية التجارة وبعدين والدي كنت ماسك له حاجات البنوك وقت ما كان شغال في ليبيا".

تجربة ترجمة نجيب ساويرس
وأشار ساويرس: "لما رُحت سويسرا كنت بترجم من الألماني للعربي، وشركة بتاعت لغات أعطتني كتاب بالكامل أترجمه فأخدت ترجمته في مصر ب50 جنيه واخدت منهم 7 اَلاف فرنك".

نجيب ساويرس: مش بحب لقب رجل أعمال والسياسة ماتنفعش مع شخصيتي (فيديو)
نجيب ساويرس معلقا على صورة محمد صلاح وابنته: حبيبنا أبو مكة
فترة عمل نجيب ساويرس مع والده
ولفت نجيب ساويرس: "انا كنت أكبر واحد في اخواتي ولما رجعت من برة قررت أشتغل لوحدي مش مع والدي، واشتغلت لوحدي سنتين مع شريك من سني وكنا بنبيع تكييفات، وكسبنا مبلغ كويس وعملنا شركة مع بعض، ونجحنا نجاح غير عادي، وخلال سنتين ونصف كل واحد عمل ربع مليون دولار، واحنا عندنا 23 سنة، فجأة لقيت نفسي أغنى واحد في مصر في السن ده، وجيبت لنفسي عربية، وبعد كده والدي قال لي تعالى اشتغل معايا وكان عنده مكتب صغير، فقلت له هاشتغل في حاجات تانية وبعدين دخلت علي السكة الحديد وبقينا نورد كل حاجة في السكة الحديد وبنبنى خطوط السكة الحديد، وبعدين دخلت علي المقاولات واخويا الصغير لما رجع خد المقاولات، وبعدين كملت انا في ال "آي تي"، واخدنا توكيل اتش بي مايكروسوفت، وبعدين عملت اول شركة انترنت في مصر وبعدين اخدت رخصة موبينيل، وده كانت لعبة بيزنس جديدة".
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري ل أخبار الفن والعديد من الأنشطة الثقافية والأدبية.