مؤتمر مهرجان الجونة.. انتهاء أزمة يسرا وانتشال التميمي.. ونجيب ساويرس يرد على الشامتين في الحريق.. وحقيقة دفع أموال للنجوم

انتهى، منذ قليل، المؤتمر الصحفي لمهرجان الجونة السينمائي في دورته الخامسة، والذي تم خلاله الإجابة على الكثير من التساؤلات حول مدى تأثر حفل الافتتاح غدًا بالحريق الذي نشب بأحد أركان منطقة الاحتفالات، وصحة ما تردد عن دفع أموال للمشاهير، وتم وضع نهاية لخلاف الفنانة يسرا وانتشال التميمي.
رد قوي من نجيب ساويرس على الشامتين في حريق مهرجان الجونة
نجيب ساويرس عن "الجونة السينمائي": مش مهرجان فساتين والدورات الجاية أسهل
السيطرة على حريق مهرجان الجونة
وقال رجل الأعمال المهندس سميح ساويرس: "الحمد لله الحريق كان في ركن لفعاليات المهرجان، ومحصلش حاجة في المكان الأساسي، واللي هيتضرروا اللي كانوا هيقعدوا في أماكن ال VIP، والحقيقة إن مدير أمن البحر الأحمر بعت لنا كل سيارات الإطفاء المتاحة وتم السيطرة على الحريق، واللى هييجي بكرة مش هيلاقي إن فيه حريق خالص والسقالات متركبة والدنيا شغالة علشان ميبقاش فيه آثار لأي حاجة".
مصابو حريق مهرجان الجونة
وطمأن "ساويرس" الحضور بالمؤتمر والمصريين، على المصابين خلال حريق منطقة احتفال مهرجان الجونة السينمائي، قائلًا:"أنا زورتهم وكلهم بخير".
حقيقة دفع أموال للنجوم لحضور مهرجان الجونة
ورد رجل الأعمال المهندس سميح ساويرس، على سؤال لأحد الصحفيين: "أنتو بتدفعوا فلوس للمشاهير والنجوم للظهور على الريد كاربت؟".
وأكد سميح ساويرس: "عايز أقولك السنة دي ما دفعناش ولا مليم لأي ممثل، وفي السنة الخامسة بقينا جاذبين كفاية، ونضجنا كفاية ووصلنا لمرحلة إننا نقدر نعيش من غير ما ندفع لأي ممثل مشهور انه يجي عندنا ودا هيستمر للدورات القادمة"، لتعلق يسرا: "عمرنا ما دفعنا لأي ممثل سواء الدورة دي أو الدورات السابقة".
قرار جديد من إدارة مهرجان الجونة
وأوضح "ساويرس": "المبدأ عندنا في مهرجان الجونة السينمائي إننا مش هندفع لأي ممثل مشهور انه يجي المهرجان لأننا بقينا جاذبين".

نجاح مهرجان الجونة
وقال رجل الأعمال المهندس نجيب ساويرس: "كنت أتوقع نجاح مهرجان الجونة السينمائي، ولما بحط حاجة في دماغي بعملها علي أحسن وجه، وربنا وفقنا في نجاح المهرجان".

فكرة مهرجان الجونة السينمائي
وتابع: "أنا بحب السينما وده اللي شجعني على دعم مهرجان الجونة، وقلت لازم أجيب حد عنده الخبرة في المهرجانات وبشري رشحت ليا انتشال التميمي ولقيته رجل هادئ ومؤدب ومنظم وتحدثت معه لقيت انه قليل الكلام ولكن كبير في الخبرة والمعرفة وعاشق للسينما، واكتمل الفريق، وتواصلت مع سميح ساويرس، أول مرة أعمل مع سميح ساويرس حاجة سوا وعمرنا ما اشتغلنا قبل كده مع بعض، ولما قلت له علي فكرة المهرجان لقيته مرحب واتشجع لتأسيس المهرجان".
أجمل سنين حياة نجيب ساويرس
وأضاف: "أول سنة في مهرجان الجونة كانت من اجمل سنين حياتي، وأغنية 3 دقات كانت مكسرة الدنيا وحسيت إن ايد ربنا معانا، والحمد لله استمر المهرجان للدورة الخامسة وده دليل على النجاح".
ميزة مهرجان الجونة من وجهة نظر يسرا
وكشفت الفنانة يسرا، عن رأيها في مهرجان الجونة السينمائي مع وصوله للدورة الخامسة، مؤكدة: "المهرجان فتح مجال لأفلام كتير تيجي".
وتابعت:" "مهرجان الجونة له طعم مختلف وإحساس مختلف خالص في كل شيء.. مختلف على الحلو والجمال، والمهرجان فتح المجال إن الناس تعرف مدينة جميلة وساحرة زي الجونة".
حياة مدينة الجونة
وأضافت يسرا: "فعلا لما جينا لمهرجان الجونة السينمائي لقينا حياة مختلفة هنا في مدينة الجونة".
تعليق نجيب ساويرس على حريق مهرجان الجونة
وعلق رجل الأعمال المهندس نجيب ساويرس، على حريق منطقة احتفالات مهرجان الجونة السينمائي في دورته الخامسة.
وأضاف:"فيه أمثال ممكن نسقطها علي الحريق ومنها الحريق خد الشر وراح، واللى يجي في الريش بقشيش، وبكرة بالليل الناس لما تحضر حفل الافتتاح مش هتلاقي أي أثر للحريق".
وأضاف: "يا جبل ما يهزك ريح.. ولازم نقبل من ربنا الحلو والمر".
الشامتون في حريق مهرجان الجونة
ورد نجيب ساويرس، على الشامتين في حريق منطقة احتفالات مهرجان الجونة السينمائي في دورته الخامسة.
وتابع: "فيه ناس فرحت بحريق منطقة احتفالات مهرجان الجونة بس ربنا ما بيدهومش الفرصة، والحمد لله جت سليمة".

رأي والد نجيب ساويرس في مدينة الجونة
ولفت: "والدي كان يقول لو أخوك سميح معملش حاجة في حياته فكفاية إنه عمل مدينة الجونة، مدينة الجونة تمثل الحدث ونهرب فيها من صخب القاهرة والتلوث والقمامة وبنلاقي نفسنا في مكان جميل".

وكشف نجيب ساويرس، عن حجم النجاح الذي حققه مهرجان الجونة السينمائي في دوراته السابقة وصولا للدورة الخامسة، التي تنطلق غدا الخميس.
قيمة مهرجان الجونة السينمائي
وأضاف: "اللي احنا وصلنا له نجاح هايل، ودلوقتي مفيش حد ما سمعش عن مهرجان الجونة، ولما رحت مهرجان كان والمهرجانات الأخرى لقيت الناس كلها عارفة المهرجان".

الحصول على أفضل الأفلام العالمية
وتابع:"عايزين نخلص من التسطيح وكلام إنه مهرجان الفساتين، واللي بيقولوا كده دول هما اللي مجوش المهرجان، وصعب جدًّا إننا نتحصل على أفضل الأفلام العالمية في السنة إلا لو كنا ناجحين".

دورات مهرجان الجونة المقبلة
وأكمل:"ولو المهرجان ملهوش قيمة محدش هيجيلنا، وكل النجوم العالميين حضروا المهرجان، السنين الجاية للمهرجان هتكون أسهل لأننا أثبتنا جدارتنا".
مصيبة الكورونا

قال رجل الأعمال المهندس نجيب ساويرس: "الكورونا زي المصيبة لأنها تسببت في موت ناس كتير وقطع عيش ناس كتير وتدمير اقتصاديات وقطعت التواصل الاجتماعي ومفيش مصيبة أكبر من الكورونا".
وتابع:"الدورة الخامسة تحدي بسيط مقارنة بالكورونا".

طفرة مهرجان الجونة السينمائي

وأكد:"مهرجان الجونة السينمائي عمل طفرة من خلال التسويق للمخرجين والممثلين المصريين للمشاركة في أعمال فنية عالمية، وسلطنا الضوء علي مصر وتنظيمها لمهرجان عالمي، وتسويق الأعمال الفنية الجيدة، ووضعنا المهرجان في نفس مستوي مهرجان "كان" وفينسيا".

انتهاء ازمة يسرا وانتشال التميمي
مازح رجل الأعمال المهندس نجيب ساويرس، مؤسس مهرجان الجونة، الفنانة يسرا، بعدما قامت بمصافحة المدير التنفيذي لمهرجان الجونة السينمائي، انتشال التميمي، واعتذر الأخير لها عن سوء الفهم لبعض تصريحاته بشأن تكريمها.

وتقدم انتشال التميمي بالاعتذار للفنانة يسرا معربًا عن مدى تقديره لها، قائلًا: "بتستحق منا جميعًا الاعتذار والاحتفاء ولها مني الحضن"، فتدخل المهندس نجيب ساويرس، مداعبًا الحضور: "هو عمل كدا علشان الحضن دا.. وأنا كمان ليا حضن".