كنباوي وكنباوية.. حلقة رقم (105).. قناة الحظيرة وإمام المنافقين !!

كنباوية تغلي وتجز على أسنانها وتسب وتلعن وهي تشاهد قناة الحظيرة مباشر مصر يدخل عليها كنباوي
كنباوي: ايه اللي معصبك كده النرفزه وحشة عليكي وانتي حامل بلاش قلق وتوتر ماصدقنا أن الأمور هديت شوية وبكره حيبقي أحلي بأذن الله بعد ما اعتصام رابعة والنهضة ينفضوا وكل واحد يروح لحاله والناس تروق بقي وتشوف مشاغلها واللي وراها كفايانا بقي عطلة.

كنباوية: ماهو الهم ورانا ورانا أنا قلت أقعد أشوف الحظيرة دي بتقول إيه على مصر لقتها قناة في قمة البشاعة والتحريض وقلب للحقايق وتزييفها دي مش قناة دي فتنة في الأرض الناس دي ما بتحبناش ولا بتتمنالنا الخير.. الناس دي عاوزانا نقع ويقفوا يتفرجوا علينا ياريت كل المصريين يفهموا أغراض القناة دي إيه علشان ماحدش يتفرج عليها تاني أنا لو من القائمين على الأمر كنت منعت بثها ورحلت كل العاملين فيها دي وباء وسرطان في بلدنا ربنا ينتقم منهم.

كنباوي: ممكن تهدي ملعون أبو دي قناة وفهميني الحكاية من طقطق لسلام عليكم بعد إذنك أرجوكي
كنباوية: حاضر ياكنباوي أنا حشرحلك وأفهمك كل حاجة
كنباوي: وأنا أهو سامعك بس من غير عصبية أرجوكي علشان اللي في بطنك
كنباوية: حاضر ياكنباوي ححكيلك من غير عصبية ولا نرفزة وإنت احكم أنا بتجني عليهم ولا لأ وأنا راضية بحكمك بعد ما تسمعني.

كنباوي: ماشي ياستي يلا قولي ومن غير لك
كنباوية: حاضر ياكنباوي من غير لك ولا لت وعجن
كنباوي: أتمني
كنباوية: القناه دي ملك دولة قطر وإنت سيد العارفين أن حكام قطر مابيحبوناش لأسباب كتيرة حقد بقي ما تفهم كره غل حسد فكروا في يوم من الأيام إنهم يكونوا حاجة بس هما ماعندهمش حاجة يكونوا بيها لاحضارة ولا تاريخ ولا أي شيء يذكر يقوموا يعملوا إيه قالوا مش مهم إننا نكون بلد صغير بس المهم دورنا الإقليمي يكون كبير في المنطقة مش الخليج بس لا والشرق الأوسط كمان وعلشان كده تحالفوا مع أمريكا بأطماعها في الشرق الأوسط ومخططاتها علشان تفرض هيمنتها على الدول وتحركها زي العرايس بما يخدم مصالحها في المنطقة ومصالح حليفتها إسرائيل تقوم تتفق مع قطر على إنشاء أكبر قاعدة عسكرية أمريكية في قطر تقدر تضرب منها أي دولة ترفض الرضوخ ليها أي دولة عربية ياكنباوي ووافقت قطر إنها تكون بالقاعدة الأمريكية دي أداة تهديد للعرب وبلاد كتيرة المهم مصلحتها هي واتحالفت مع إسرائيل وجابوا خبرة من إسرائيل فكروا لهم أن علشان يكون لهم دور حيوي ومؤثر في المنطقة لابد من جهاز إعلامي قوي يقدر يأثر على شعوب المنطقة وكانت البذرة اللي اتعملت من خلالها قناة الحظيرة بسياسة إسرائيلية أمريكية ومباركة قطرية تاني حاجة القناة دي اللي المفروض إنها تنقل كل أحداث العالم كرست جهدها وشغلها الشاغل كله لنقل أحداث مصر بطريقة مغلوطة بتحاول بيها تشويه صورة مصر في الخارج وتحاول بث الفتنة جوه مصر بأنها تنقل أحداث غير حقيقية وتحاول تعرف المصريين أن الإعلام المصري كاذب ومضلل وهمه بس اللي عندهم الحقيقة وأشاعوا فتن كتيرة في مصر وعملوا بلبلة مالهاش أول من آخر من يوم ثورة يناير لحد دلوقتي ده غير إنهم كانوا مرحبين بحكم الإخوان لأسباب كتيرة إن الإخوان كانوا حيحققوا لهم مصالحهم في مصر سواء بقي بمنطقة تجارة حرة بحصة وأسهم في قناة السويس بتأجير الآثار بأي طريقة كانت وزعلوا جدا من هزيمة الإخوان وعزل مرسي وابتدوا يقلبوا الشعب المصري على بعضه وينقلوا صورة غير حقيقية للغرب عن اللي بيحصل في مصر علشان الناس تتعاطف مع الإخوان المسلمين والغرب يقطع المعونة عننا طالما إحنا بالشكل ده ما بنحترمش حقوق الإنسان ولا منظمات حقوق الإنسان الدولية وحاولوا يوصلوا للعالم إن اللي حصل يوم 30 يونيو مش ثورة على حكم الإخوان الفاشل لا ده انقلاب عسكري كل ده عملته قناة الحظيرة في مصر النهاردة بقي جايبين عالم إسلامي كان فاضلا وجليلا اشتروه بفلوسهم وأدوله الجنسية القطرية وعملوله حاجة كده زي الأزهر مجمع أو منظمة إسلامية وعينوه كبيرها وطلعوه النهارده يفتي ويقول إن اللي حصل في مصر انقلاب على الشرعية قام بيه بلطجية وفلول ونصاري وعسكر خاينين وقال إن السيسي تآمر على مرسي وقتل النساء والشيوخ والأطفال العزل المسالمين علشان هو رافض الحكم الإسلامي وإنه لما طلب تفويض من الشعب كان عاوز التفويض ده علشان يقتل بيه الإخوان المسلمين اللي الراجل كدب وقال إن اعتصاماتهم سلمية ومفيش أي قطعة سلاح واحدة في رابعة العدوية أو النهضة ولا يوجد في الاعتصامين سوي المصاحف، وإن المعتصمين مابيعملوش حاجة غير إنهم قاعدين يصلوا الفروض والسنن والنوافل والتهجد والقيام وقراءة القرآن والتسبيح طيب واحد زي ده الواحد لما يسمعه يقول له إيه ما تآخذنيش ياكنباوي مش المفروض اللي يسمعه يسمعه رد فعل صوتي إسكندراني قبيح على كدبه ونفاقه ده.

كنباوي: عندك حق ده مأجور منافق كداب الله يجازيه يمكن كبر وخرف
كنباوية: هو فعلا كبر وخرف وبقي عار على الشيوخ الله يرحم الشعراوي ومحمد عبده ده بقي مسخة الشيوخ المنافقين الضلالية عرفت أنا ليه كنت متعصبة وأنا بتفرج على الشيخ شخشيخة ده ؟
كنباوي: أيوه عرفت وعندك حق بس اهدي علشان الحمل وملعون أبو القناة على البلد اللي جات منها على أبو الشيوخ اللي بالشكل ده يلا روقي السيسي ربنا حينصره ويقف معاه وجنبه بعون الله.

كنباوية: آمين يارب العالمين فعلا الشيخ ده إمام المنافقين يلا لما أقوم أحضر الفطار المدفع على وشك يضرب.
كنباوي: يلا واستهدي بالله
كنباوية: ونعم بالله !