بعد أزمة الفاتورة الإلكترونية..عمرو أديب ل المالية: نسألكم التخفيف.. الناس مزنوقة زنقة صعبة

علق الإعلامي عمرو أديب، علي اعتراض عدد من النقابات ومنها المحامين والأطباء، علي تطبيق الفاتورة الإلكترونية.

عمرو أديب يوجه سؤالا قويا للمالية
وقال عمرو أديب خلال برنامج "الحكاية" المذاع علي قناة "ام بي سي مصر":"سؤال بسيط لوزارة المالية هل ده وقته؟ إحنا في أزمة عالمية استني شوية علي تطبيق الفاتورة الإلكترونية، في أعباء سياسية واقتصادية، أنا حاسس إنك عايز تاخد مني فلوس وبتحاصرني؟ نقعد نتكلم سوا ويبقى فيه وفد من النقابات ونظبط الدنيا ونعدي السنة دي وبعدين نبقى نشوف".

مشكلة الاقتصاد غير الرسمي
وتابع:"هي الناس في مصر عايشة ازاي؟ كلنا عارفين ان جزء كبير من الاقتصاد غير رسمي وبيقدر بمليارات زي السوق السوداء والدروس الخصوصية والمتهربين من الضرائب وغسيل الأموال، فيه ناس كتير عايشة كده وهما خارج مظلة الضرائب، فيه ناس الضرائب متعرفش عنها خالص ومحدش يعرف عنهم حاجة خالص ومبيدفعوش مليم للضرائب، كمية الناس اللى برة الضرائب اكثر كثيرا من اللى جوا الضرائب".

نداء عمرو أديب للحكومة
وأكمل:"حكاية 20 ديسمبر يا اما الدفع والفاتورة الإلكترونية يا اما الحبس والغرامة ميتنفعش لازم نستنى كويس، أي مواطن اَخر مرة راح لمحامي وطبيب امتى اخدت فاتورة الكترونية؟ الإجابة مفيش
في السنة الصعبة المزنوقة دي جاي تقولي لازم اشوف كل الفواتير، لما تخيرلي كمواطن إني ادفع اقل ولا أخد فاتورة الكترونية وادفع اكتر اكيد هارفض الفاتورة الإلكترونية وهيطلب توفير، الناس بتروح تشتري سلعة التاجر بيقوله لو باظت ابقى هاتها من غير فاتورة".
بعد احتجاجات المحامين والأطباء.. الضرائب تكشف شرطًا واحدًا للاستثناء من منظومة الفاتورة الإلكترونية
محامو سوهاج وقنا يرفضون التسجيل في منظومة الفاتورة الإلكترونية
صعوبة الظروف المعيشية للمواطنين
ولفت:"الحكومة قامت باشياء عظيمة وأجلت زيادات البترول والغاز والكهرباء وعملت زيادة في دعم البطاقة التموينية والناس تعبانة ومزنوقة زنقة صعبة مينفعش نقولهم دلوقتي حطلي الفاتورة الإلكترونية ونزود الضرائب، لا مينفعش نستنى شوية، الوقت صعب شوية، وبطلب من السادة وزارة المالية نسألكم التخفيف ونستني شوية ونظبطها مع الناس والنقابات وممثلين نقابة المحامين والأطباء والميكانيكية ونقولهم نظبطها ازاي..الخناقة بتاعة الفاتورة جاية في وقت صعب، لازم نظبط المنظومة بس نستني شوية".

نفى محمد سرور، مدير المكتب الفنى لرئيس مصلحة الضرائب، وجود أي استثناءات للنقابات المهنية من التسجيل بمنظومة الفاتورة الإلكترونية.

استثناء النقابات المهنية من التسجيل في منظومة الفاتورة الإلكترونية
وقال مدير المكتب الفنى لرئيس مصلحة الضرائب، في تصريح خاص ل "فيتو"، إنه لن يتم استثناء أي فئة سواء كانت نقابة مهنية أو غيرها إلا بشرط إصدار قرار سيادي أو من خلال وزير المالية بالاستثناء، وهو ما لم يحدث حتى الآن.

وألمح سرور، أن نقابة المحامين وغيرها من النقابات المهنية غير ملزمة بإصدار فاتورة إلكترونية، ولكنها مُلزمة بالتسجيل في منظومة الفاتورة الإلكترونية لكي تستطيع إصدار إيصال مهني.

إلزام جميع ممولى مصلحة الضرائب المصرية بمنظومة الفاتورة الإلكترونية
وكان مختار توفيق رئيس مصلحة الضرائب المصرية أكد أنه سيتم اكتمال إلزام جميع ممولى مصلحة الضرائب المصرية بمنظومة الفاتورة الإلكترونية فى منتصف ديسمبر 2022، مشددًا على ضرورة التزام جميع الممولين الصادر لهم قرارات إلزام بمنظومة الفاتورة الالكترونية بجميع مراحلها، بسرعة الانضمام للمنظومة حتى لا يقعوا تحت طائلة العقوبات القانونية.

منظومة الفاتورة الإلكترونية
وأشار مختار توفيق إلى أن المنشآت الفردية سواء كانت تجارية أو صناعية أو خدمية أو مهنية مثل ( الدكتور،والمهندس ، والفنان، والمحاسب القانوني، والاستشاري، وجميع أصحاب المهن الحرة ملزمون بالتسجيل بمنظومة الفاتورة الالكترونية فى موعد أقصاه 15 ديسمبر المقبل، وإرسال فواتيرهم على منظومة الفاتورة الإلكترونية، وذلك فى حالة تعاملهم مع منشآت مسجلة بمصلحة الضرائب.

وأضاف: أما اذا كان الممولون كل تعاملاتهم مع مستهلك نهائي وليس مع شركات أوضح " مختار توفيق " أنهم أيضا ملزمون بالتسجيل بمنظومة الفاتورة الإلكترونية فقط، في موعد أقصاه 15 ديسمبر القادم وفي هذه الحالة يقوم الممولون بتقديم طلب ارجاء اصدار فواتير على منظومة الفاتورة الإلكترونية إلى المأموريات التابعين لها لحين صدور قرارات إلزام لهم بمنظومة الإيصال الإلكترونى.