أبين زين

وأقول على المستخبى واللى مش معروف.. أضرب فى ودعى .. وتمللى بادعى.. والمستخبى باقوله ع المكشوف
بديع ياشاطر.. وشاطر يابديع.. الرمل بيقول خلاص.. نجم السطوع بيضيع.. ومافيش لزوم للتحايل أو لسد منيع.. مش راح يفيد لعتصام والشجب والترويع.. ولا حتي قطع الطريق أو قتل مر فظيع.. الشعب عارف طريقه يصحح التجميع.. لصفوف شبابه ورجاله بشكل حر سريع.. وبكل حب وسلام بعيد عن التفريع.. وحد صفوفه عشان يبني بشكل رفيع.. ومد إيده لكم ورفضتوا في تقاليع.. فاشرب بقي كأس خلافكم للجميع يابديع.. وبلاش تحرض على الفوضى أو التقطيع.. د مصر طول عمرها ما تعرف الترقيع.. وبتعرف اللي اشتري م اللي لها بيبيع.. واسمع كلامي مافيش فايدة من التلكيع.. انتو انكشف نجمكم في كل المواضيع.. لا نجحتوا في المريسة أو حتي في التشريع.. لما البلد فلست.. من شدة التلميع.. قالت لكم بالسلامة.. ماعدش فيه تشجيع.. للانقسام والخلاف.. ولا حد لك حيطيع.. والرمل قال كل حاجة.. ماعدش ليكو شفيع.. فكر ياشاطر بقي.. وفي اللي جاي يابديع.