أبين زين

وأقول على المستخبى واللى مش معروف.. أضرب فى ودعى .. وتمللى بادعى.. والمستخبى باقوله ع المكشوف
لأ..لأ بقي مش كدا.. الرمل مش مبسوط.. بيقول جناب حضرتك في المرمي مش بتشوط.. وكل واحد يعارض في القيود مربوط.. وتقول لنا كل خُطبة كلامكو ليه مغلوط.. وأنا ما أحبش كمان يبقي الحوار مشروط.. وكل حبة تقول عقد الكلام مفروط.. وكل ماتشوفه انت.. هو دا المخطوط.. وكل ما يفيد جماعتك هو دا المخطوط.. وبص شوف الودع.. مافيش لبحره شطوط.. واقول لك إيه وللا إيه.. كل البشر مكبوت.. ووزارة في كل حاجة واقفة كالمربوط.. والشرطة بْرضُه بتتظاهر وليها شروط.. وموظفين واقفة تصرخ.. حقنا مشفوط.. وفلاحين من قرفها ضهرها مشحوط.. والبلطجية في وسط الزحمة كالقرموط.. فقول لنا نعمل إيه.. السور بقي منطوط.. وكل واحد له سلطة.. في العباد بيشوط.. اسرع في حل المشاكل اللي بيها منوط.. مش كل حبة مظاهرة من قنا لأسيوط.. والكل بيقول فين الثورة.. كفانا سقوط.. وأنا قلت لك كل حاجة والكلام مظبوط.. فياريت بقي مالتقيش اللي انكتب مكشوط.. وألْقَي الجميع في الرياسة بالعمل مخروط.. أحسن دماغي في حيط القريفة مخبوط.