مجدي الهواري يوضح سبب هجومه على محمد صلاح

أوضح المخرج والمنتج مجدي الهواري سبب هجومه على النجم المصري العالمي محمد صلاح في منشور له عبر صفحته على فيس بوك.

وكتب مجدي الهواري منشور جديد قال فيه:
طب توضيح وتصحيح لبوست محمد صلاح.. المفروض انا معروف قد ايه انا بحب محمد صلاح مش محتاج اقول ده ! لاني بشجع النادي اللي بيلعب فيه بس.. علشانه وقبل كده كنت بشجع روما وقبلها تشيلسي بردو علشانه.. وحاطط صورته فوق سرير بطل مسلسلي طول ال30 حلقة علشان يبقى قدوة لكل جيل والشباب اللي بيشوفوا المسلسل ومنهم ولادي.. وانا واحد من الناس شايف انه مش واخد حقه وقولت ده كتير ! سواء في فرصة الكرة الذهبية ولا حتى في مرتبه اللي بياخذه حاليًا !! بس رأيي مش مهم جنب المعايير العالمية لفرصة الاتنين".

وأضاف: "بس جات الفرصة في العروض اللي بتتعرض عليه في نوادي تانية بالرقم اللي هو عايزه ويمكن اكتر سواء في باريس سان جيرمان او الريال وهو عارف ان ليفربول مش يدفعوا الرقم ده لحسابات كتيرة.. واكتر رقم هيدفعوه هو ال 400 الف.
وانا كتبت قبل كده اوعي تمشي ياصلاح من نادي عملك نشيد !! المشكلة مش هنا، ولا المشكلة في الانتقال! المشكلة في الحسم ! في القرار ! علشان صلاح يركز في الكورة.. والله ده كان قصدي".

وتابع مجدي الهواري: المشكلة في سبب كتابة البوست الانفعالي جدا علشان مصلحته في اللي كتبته !! المشكلة ان ابننا صلاح تركيزه في المباريات بيقل لما يكون في حاجة تانية شاغلاه ومحدش ينكر ده ! لدرجةً ان الخصم بقي يلعب علي ده وواضح ان مدير اعماله مش باعد عنه كل كلام المفاوضات ومخليه يفكر طول الوقت معاه.. لازم يشتغل علي نفسه في الموضوع ده زي ما اشتغل علي نفسه في حاجات كتيرة وبقي قدها واتخلص منها !! زي اتقان اللغة وتحديات كتيرة جدًا وتدريباته المستمرة على رفع كفاءة الأداء، وبعدين مع كارثة كمان خروجنا من كأس العالم اللي لحد دلوقتي مأثرة عليه واحساسه بالمسؤولية أمام الشعب المصري كله . مش بس جمهور الكورة اللي احنا نفسنا واضح نسيناها وهو الوحيد اللي لسه متأثر بيها !! مع الفرصة الضائعة في الكرة الذهبية تاني !! لانه معملش حاجة لمنتخب بلده. واللي مخليه مش بينام بسببها..الله يكون في عونه الصراحة احلام كتير بيفكر فيها وأفكار كتيرة بترن جواه ومخلياه مش فى الفورمة بقاله شوية حلوين !! هو انتم كمان مش معايا انه من ساعة مارجع من أفريقيا وهو مش تمام !! ولا مش متابعين الفرص الكتير الضائعة منه اليومين دول ولا كلوب لمًا قال صلاح بنعالجه بعد رجوعه ..قولوا كلمة حق بقي !! لصالحه".

وأردف: بس اليومين دول يومين حسم الألقاب ياابو صلاح مفيش دلع دوري بعد ماتش تعادل توتنهام وأبطال أوروبا وماتش الريال والثأر القديم، ولقب الهداف اللي سون قرب منه بعشرين جون وتركيزك في الانتقال والمفاوضات.. علشان كده بقولك انت في خطر !! ركز
واختتم قائلا: اعتقد إن كلامي كده وضح ياجماعة اني خايف علي صلاح وده سبب في انفعالي لانه الحاجة الوحيدة الحلوة اللي حيلتنا.. ولا ايه !! انا عايزه يركز في الكورة في الملعب لانه ده هو اللي هيجيب له ويجيب لنا كل الخير.. مساء الخير ياصلاح و زي ما تريكه بيقوله ! ركز ياصلاح، اشوفكم بعد ماتش الريال !! مباراة الحسم !! اتمني. عودة صلاح بكأس أبطال أوروبا.. يارب يبقى كلامي حماسي للفرعون الصغير فخر قلبنا".