مجدي الهواري يتراجع عن هجومه على محمد صلاح: «مش عيب»

تراجع المخرج مجدي الهواري عن هجومه على اللاعب المصري محمد صلاح، وحذف المنشور الذي كتبه عبر حسابه على فيسبوك، والذي وصف فيه صلاح بأنه محدث نعمة، بسبب مماطلته التعاقد مع ناديه ليفربول، ونشر منشورا آخر يوضح فيه قصده من المنشور الذي حذفه.
وقال الهواري عبر فيسبوك: طب توضيح وتصحيح لبوست محمد صلاح قبل الحذف (مش عيب).. المفروض إن معروف قد إيه أنا بحب محمد صلاح مش محتاج أقول ده؛ لأني بشجع النادي اللي بيلعب فيه بس علشانه، وقبل كده كنت بشجع روما وقبلها تشلسي بردو علشانه، بس رأيي مش مهم جنب المعاير العالمية لفرصة الإتنين، بس جات الفرصة في العروض اللي بتتعرض عليه في نوادي تانية بالرقم اللي هو عايزه ويمكن أكتر سواء في باريس سان جيرمان أو الريال وهو عارف إن ليفربول مش يدفعوا الرقم ده لحسابات كتيرة، وأكتر رقم هيدفعوه هو ال400 ألف.
وأضاف: وأنا كتبت قبل كده أوعى تمشي يا صلاح من نادي عملك نشيد، المشكلة مش هنا ولا المشكلة في الانتقال.. المشكلة في الحسم في القرار، علشان صلاح يركز في الكورة والله ده كان قصدي، المشكلة في سبب كتابة البوست الانفعالي جدا، علشان مصلحته في اللي كتبته.. المشكلة إن ابننا صلاح تركيزه في المباريات بيقل لما يكون في حاجة تانية شغلاه ومحدش ينكر ده لدرجةً إن الخصم بقي يلعب على ده وواضح ان مدير اعماله مش باعد عنه كل كلام المفاوضات ومخليه بيفكر طول الوقت معاه .. لازم يشتغل علي نفسه في الموضوع ده زي ما اشتغل على نفسه في حاجات كتيرة وبقي قدها.
وتابع: بعدين مع كارثة كمان خروجنا من ك أس العالم اللي لحد دلوقتي مأثرة عليه وإحساسه بالمسؤلية أمام الشعب المصري كله، مش بس جمهور الكورة اللي احنا نفسنا واضح نسيناها وهو الوحيد اللي لسه متأثر بيها مع الفرصة الضايعة في الكورة الذهبية تاني لأنه معملش حاجة لمنتخب بلده، واللي مخليه مش بينام بسببها.
واستطرد: الله يكون في عونه الصراحة أحلام كتير بيفكر فيها وأفكار كتيرة بترن جواه ومخلياه مش في الفورمة بقاله شوية حلوين، هو أنتم كمان مش معايا إنه من ساعة ما رجع من أفريقيا وهو مش تمام، ولا مش متابعين الفرص الكتير الضائعة منه اليومين دول ولا كلوب لمًا قال صلاح بنعالجه بعد رجوعه.