صيام عن الهري !

يعني إنتوا فاكرين الصيام إنك في عز الحر ده ما تشربش ميه تبل ريقك.. بس.
أو حتي يعني الصيام إنك في عز طول ساعات الصيام والصيف الحلو اللي فيه الإجازة ومليان فواكه ما تعرفش تاكل ولا حاجة
وتعد طول النهار نايم وتصحي على مدفع الفطار وتفضل تاكل وتحشر بطنك لحد ميعاد السحور وفي النص بقي تسلي صيامك بسيرة فلان وعزومة علان اللي كان بخيل وما جابش غير 3 بطات وديك رومي و12 دستة جاتوه في عزومة أول يوم رمضان، لأ وكمان تشوف نحو 37 مسلسلا من مجموع 132 مسلسلا بيتعرضوا في شاشات التليفزيون لدرجة أن أول مرة السنة دي الإعلانات مش لاقية مكان ما بين المسلسلات.
الصيام عن الهري برضه جزء من الصيام ومش بس الهري اللفظي كمان الهري عن طريق مواقع الهري والرغي الاجتماعي يجب أن يكون فيه ترشيد وأهه الإخوان مشيوا والنور بقي بيجي عادي.. يعني ما فيش إفيهات.. صحيح جات علينا بخسارة.. بس ده نوع من أنواع تشجيع الصيام عن الهري!.