انقلاب ولا ثورة؟

لسه الواد السيس مش مصدق إن البيه بتاع المودرية باعه عشان منظره قدام زمايله في المودرية.. والمشكلة دلوقتي بقت مع أصحابه السيس اللي زيه اللي بقوا بيبصوله باستحقار وهو كل شوية يتخانق معاهم.. وعشان مشاعره وأحاسيسه اللي اتضربت في مقتل.. وكرامته اللي ساحت مع الجيل اللي دهنه في شعره.. قالهم اللي حصل دا انقلاب.. أصحابه السيس قالوله عيب متقولش كدا أنت راجل يعني هو قلبك إزاي..
فرد بألاطة عليهم: أيوة هو كدا قلب علىّ.. أكيد حد رزعني إسفين عنده عشان كدا قلب علىّ..
قالوله أنت بس اللي زودتها حبتين هو قالك عيش حياتك لكن أنت اللي اتنططت وعملت زي فرقع لوز وأديك وقعت على قفاك يا سيس..
الواد السيس فكر في حيلة يحنن بيها قلب البيه بتاع المودرية تاني عليه.. راح ملخمط وشه شوية دم وخلى أصحابه السيس يصوروه بكاميرا "النومايل".. ويبعتله "مسج" ويقوله شوف يا باشا رجالتك اللي في الكمين عملوا فيّ إيه.. أنا عايز حقي يا باشا دا إحنا فيه بينا رنات ومصالح وياما وقفتلك في عركات قبل كدا..
أصحابه السيس قالوله أنت عبيط يا ابني هو أنت فاكر إن قلب البيه بتاع المودرية عاطفي قوي كدا هيتأثر بمنظر الدم.. يا حبيبي افهم بقى مصلحته معاك خلصت عشان كدا كرفك وثار عليك.. يعني دي ثورة مش انقلاب يا سيس.. وصدقني كلمة من إخوات سيس زي بعض لو هو لسه له مصلحة معاك كان هو فبركلك الصور دي ووزعها على كل زمايله في المودرية عشان تبان مظلوم.. لكن هو كرفك افهم بقى بالجيل اللي في شعرك دا!!