واامعزولااااه..

أوعي حد يفتكر أنه ممكن فريسكا تكون شمتانة في أي حد.. لا يمكن أبدا ولا أخلاقي ولا طباعي.. لكن تعمل إيه في ديل الكلب..
تفضل تحاول تعدل فيه وتقوله يا ابني فكر.. جماعتك مش هتنفعك.. مش هينفعك اللي فوق كتافك دي استخدمها شوية.. يقولك كله إلا مرسي والجماعة والمرشد.
فاكر لما كنت بتقول كله إلا الجيش.. وكله إلا القضاء وكله إلا أكل اللحمة مستوية.. وخط أحمر خط أحمر.. أهه الخط بقى بمبي مسخسخ دلوقتي لما حاولتوا تكسروا القضاء وتشوهوه ودلوقتي الجيش الوطني المصري بقى مش عاجبكم ولا المعارضة عاجباكم.. أمال مين اللي عاجبكم؟؟ نفسكم وبس ومرسي وبس والمرشد وبس.
طيب بقى نصيحة أخيرة يمكن تنفع اللي لسة عنده طاقة في نافوخه فاضية من هري وهرس الجماعة يحط كلمتين حلقة في ودانه.. ولا مرسي ولا الجماعة ولا المرشد ولا القيادات بتنزل معاكم في أي حتة وبيبقوا أعدين في البيت مستنين عدد الوفيات عشان يشتغلوا بيها في الإعلام..
أزيدكم من الشعر بيت.. قالك زمان أيام انتخاباته قول وااااااااااااااااا مراساااااااااااه.. هتلاقيه واقف جمبك وبيشجعك.. جرب كدة اليومين دول تقول وااااااااااااا معزولاااااااااااااااه 10 مرات بعد السحور وبعد الفطار.. يمكن تلاقي حد يرد عليك.. صحيح اللي عنده عقل أحسن من اللي عنده عزبة!