عمرو أديب يشكر الرئيس: ربنا نجاني من الموت بأعجوبة

قال الإعلامي عمرو أديب: "ربنا نجاني بأعجوبة وأنا نفسي مش مصدق وعندي سعادة غير عادية بالناس بتوع البلد والبلاد اللي حوالينا وهم أجمل مما أتخيل، والناس كانوا سبب في أني أتحسن كل يوم وكانوا كويسين أوي معايا".
وتابع خلال برنامج "الحكاية" المذاع على قناة "MBC مصر": "الناس كانت حلوة أوي معايا وعملتلي حالة من حالات البهجة، وفي ناس معايا في المدرسة كلمتني لتطمئن عليا، وبجد البلد دي عظيمة وناسها ناس جميلة وإخواتي في العالم العربي وقفوا معايا وقفة غير طبيعية".
وأكمل: "كل شيء حصل ليا كان جميلًا جدًا وأسجد لله شاكرًا على نعمة الحنية والطبطبة والسعادة وكل شيء، وعندي في البيت وفي الشغل كميات ورد وشيكولاتة تكفي بلد".
واستطرد: "أخص بالذكر الرئيس عبد الفتاح السيسي للسؤال والرعاية وهذه أول مرة يسألي عليا ويهتم بيا لأن مصايبي كتير، كما أشكر سمو العهد محمد بن سلمان على السؤال والرعاية، وأشكر الشيخ محمد بن زايد، وأشكر مجلس الوزراء كله ولا يوجد وزير إلا واهتم بي واطمأن عليا، وأشكر اللواء عباس كامل، وكل فنانين مصر والوطن العربي، وأشكر مستشفى دار الفؤاد على كل الإجراءات الطبية اللى اتعملت معايا والرجل اللى عمل معايا الحادثة".
وأشار: "الأهم في السؤال عليا كان من الناس البسيطة ومنهم ناس كلمتني وكانت عايزة تجيبلي محشي، وأشكر كل زملائي الصحفيين والإعلاميين وسعادتي بالبلد لأنها كويسة بجد، وليا أصدقاء مسيحيين ولعولي الشمع في الكنائس.. حسيت اأن الدنيا لسه بخير.. ولو بأبحث عن ماتش اعتزال مفيش أحسن من اللى حصل معايا بعد الحادثة".
وكان الإعلامي عمرو أديب أصيب قبل نحو أسبوع في حادث سير بنطاق محافظة الجيزة وسط تجمع المارة فور رؤية الحادث وتوقف الحركة المرورية.
وكانت غرفة عمليات النجدة بالجيزة تلقت بلاغًا يفيد بوقوع حادث سير بطريق دهشور، وانتقل رجال المرور إلى مكان الحادث، وتبين أنه أثناء سير الإعلامي عمرو أديب بسيارته وقوع حادث تصادم مما أسفر عن إصابته وآخر مرافقه وجرى نقل الإعلامي إلى مستشفى دار الفؤاد.
وعاين رجال المرور موقع الحادث للوقوف على ملابسات الحادث، وانتقل فريق من رجال المباحث الجيزة ومفتشي قطاع الأمن العام لبيان عما إذا كانت هناك شبهة جنائية أم حادث سير طبيعي.
وغاب الإعلامي عمرو أديب عن تقديم برنامج "الحكاية" الأسبوع الماضي، حيث حصل على إجازة لحين تماثله التام للشفاء.
لميس الحديدي تطمئن الجمهور
وكانت الإعلامية لميس الحديدي، كشفت آخر تطورات الحالة الصحية لزوجها الإعلامي عمرو أديب.
وقالت "الحديدي" خلال برنامجها "كلمة أخيرة" المذاع على قناة "on e": "أطمن كل الناس اللي بتسأل على عمرو بعد الحادثة الصعبة اللي تعرض لها مساء الثلاثاء الماضي".
وأكدت: "زوجي عمرو أديب بخير الحمد لله.. ربنا نجاه بأعجوبة الحقيقة.. لأن العربية اللي خبط فيها واللي وقفت فجأة، كانت محملة بأنابيب بوتاجاز فكان ممكن تنفجر في أي لحظة".
وتابعت: "الدكاترة طمنونا على زوجي عمرو، لكن هو لسه بيعاني آلام مبرحة غالبًا من الكدمات والردود".
وأكملت: "زوجي عمرو إن شاء الله يحاول يرجع لجمهوره قريبًا بإذن الله، لكن هو محتاج يستريح شوية علشان يقدر يرجع تاني".
وأضافت: "أنا طبعًا ما كنتش هقدر أنزل الشغل أو أكون معاكم إلا وأنا مطمئنة على زوجي عمرو أنه بيتماثل للشفاء وأن حالته تسمح أني أسيبه بعض الوقت.. في مثل هذه الأحداث دوري كزوجة بييجي قبل دوري كإعلامية".
واستطردت: "عاوزة أشكر كل الناس اللي سألوا علينا وعليه من أصغر حد لأكبر حد، من الجمهور البسيط اللي كان بيبعت لي رسائل ودعوات وشمع في الكنائس لأكبر مسؤولين في البلد، بشكرهم جميعًا.. بشكر زملاءنا الإعلاميين، والفنانين من كل الوطن العربية، والدكاترة اللي كانوا بيكلموني، مستشفى دار الفؤاد اللي أنقذ عمرو في اللحظات الأولى، ألفا سكان اللي دايمًا في ضهرنا.. الحمد لله قدر ولطف وربنا أنقذ عمرو أديب من الموت".
وأردفت: "زي ما عمرو دايمًا بيقول لي إننا مكناش بنزرع في البحر.. الحمد لله وساعات وقت الأزمة بيكشف لك عن معدن الناس وعن حبهم وتقديرهم وخوفهم عليك اللي يمكن ما بتحسوش في الوقت العادي.. هخص بالشكر 4 شباب بالاسم لأنهم هم دول اللي نقلوا عمرو المستشفى بعد الحادث مباشرة وفضلوا معاه لحد ما أنا وصلت مباشرة بعد الحلقة يوم الثلاثاء الماضي".