"يعاني آلامًا مبرحة".. لميس الحديدي تكشف تطورات الحالة الصحية "عمرو أديب"

طمأنت الإعلامية لميس الحديدي، الجمهور على الحالة الصحية للإعلامي عمرو أديب عقب الحادث المروري الذي تعرض له، مساء الثلاثاء الماضي، قائلة: "عاوزه أتكلم في موضوع مالوش علاقه بالشغل، عاوزه أطمن كل الناس اللي بتسأل علي عمرو بعد الحادثه الصعبه اللي تعرض لها مساء الثلاثاء الماضي ، انه الحمد لله بخير بشكل عام ربنا نجاه بأعجوبة الحقيقه".
وأضافت "لميس" خلال تقديمها لبرنامجها "كلمة أخيرة" على فضائية "ON E" اليوم السبت: "العربية اللي خبط فيها عمرو واللي وقفت فجأه قدامه، كانت محمله بأنابيب بوتجاز، فكان ممكن تنفجر في أي لحظه، فالحمد لله علي كل شيء قدر و لطف زي مابنقول"، موضحة: "الدكاترة طمنونا علي حالته عمومًا، لكن هو لسه بيعاني من آلالام مبرحه غالبًا من الكدمات والردود نتوقع أنها تأخذ بعض الوقت، وإن شاء الله يحاول يرجع لجمهوره قريبًا بإذن الله، لكن هو محتاج يستريح شويه علشان يقدر يرجع تاني".
وتابعت: "أنا طبعًا مكنتش هقدر أنزل الشغل أو أكون معاكم إلا وأنا مطمئنة عليه أنه بيتماثل للشفاء وأن حالته تسمح أني اسيبه بعض الوقت، لأن في مثل هذه الأحداث دوري كزوجه بييجي قبل دوري كإعلامية "، موجهة الشكر لكافة المسؤولين في الدولة والجمهور، قائلة: "عاوزه أشكر كل الناس اللي سألوا علينا وعليه من أصغر حد لأكبر حد، من الجمهور البسيط اللي كان بيبعتلي رسائل ودعوات وشمع في الكنائس، لأكبر مسئولين في البلد بشكرهم جميعًا".
وأردفت الإعلامية لميس الحديدي: "بشكر زملائنا الإعلاميين، الفنانين من كل الوطن العربية، الدكاتره اللي كانوا بيكلموني، مستشفي دار الفؤاد اللي انقذت عمرو في اللحظات الأولي، ألفا سكان اللي دايما في ضهرنا، وطبعا أصدقائي وأصدقاء عمرو اللي مسابونيش لحظه واحده، بعتذر إني مكنتش برد علي الاتصالات، لكن ممتنين جدًا لاهتمامهم، وحبهم اللي حسينا بيه".
وأكدت: "أنا هخص بالشكر ل 4 شباب بالاسم لأنهم هم دول اللي نقلوا عمرو المستشفى بعد الحادث مباشره و فضلوا معاه لحد ماانا وصلت مباشره بعد الحلقه يوم الثلاث، المهندس مصطفي عزب، الدكتور كريم النحاس، الدكتور طارق سلامه، المهندسة داليدا، الشباب دول أنا معرفهومش، لكنهم تصادف وجودهم في نفس مكان الحادث ونقلوه المستشفى و فضلوا معاه لحد وصولي و كملوا معايا لحد ما اتطمنوا عليه، الشباب دول انا صممت أخد أساميهم علشان اشكرهم بنفسي، فيه لسه ناس محترمه بجد ".
وأوضحت: "شكرًا لحبكم و اهتمامكم و يا رب ماحدش يجي له حاجه وحشه ابدا، خللوا بالكم من الطريق لان الحوادث بتقع في ثانيه واحده، و ربنا يحفظ الجميع".