"الحمدلله بخير".. أول تعليق للميس الحديدي على حادثة "عمرو أديب"

طمأنت الإعلامية لميس الحديدي الجمهور على الحالة الصحية للإعلامي عمرو أديب بعد تعرضه لحادث مروري مساء الثلاثاء قائلة: "عاوزه أتكلم في موضوع مالوش علاقه بالشغل، عاوزه أطمن كل الناس اللي بتسأل علي عمرو بعد الحادثه الصعبه اللي تعرض لها مساء الثلاث الماضي، انه الحمد لله بخير بشكل عام ربنا نجاه بأعجوبة الحقيقه لان العربيه اللي خبط فيها واللي وقفت فجأه، كانت محمله بأنابيب بوتاجاز فكان ممكن تنفجر في أي لحظه ".
وقالت عبر برنامجها "كلمة أخيرة" المذاع على شاشة " ON": " الحمد لله علي كل شيء قدر ولطف زي مابنقول، الدكاتره طمنونا علي حالته عموما، لكن هو لسه بيعاني من الام مبرحه غالبا من الكدمات والردوخ نتوقع إنها تاخد بعص الوقت، وإن شاء الله يحاول يرجع لجمهوره قريبا بإذن الله، لكن هو محتاج يستريح شويه علشان يقدر يرجع تاني".
وأضافت: "انا طبعا ماكنتش ح اقدر انزل الشغل او أكون معاكم الا وانا مطمئنه عليه انه بيتماثل للشفاء وان حالته تسمح اني اسيبه بعض الوقت،لان في مثل هذه الاحداث دوري كزوجه بييجي قبل دوري كإعلامية ".
ووجهت الشكر للجمهور ولكافة المسؤولين في الدولة قائلة: " عاوزه اشكر كل الناس اللي سألوا علينا وعليه من أصغر حد لأكبر حد، من الجمهور البسيط اللي كان بيبعتلي رسائل ودعوات وشمع في الكنائس، لأكبر مسئولين في البلد باشكرهم جميعا، زملاءنا الإعلاميين، الفنانين من كل الوطن العربيه، الدكاتره اللي كانوا بيكلموني، مستشفي دار الفؤاد اللي انقذت عمرو في اللحظات الاولي، ألفا سكان اللي دايما في ضهرنا، وطبعا أصدقائي وأصدقاء عمرو اللي ماسابونيش لحظه واحده. باعتذار اني ماكنتش بارد علي الاتصالات، لكن ممتنين جدا لاهتمامهم، وحبهم اللي حسينا بيه".
أكملت: " في وقت الصعاب - زي ماعمرو دايما بيقولي- اننا ماكناش بنزرع في البحر.الحمد لله. وساعات وقت الازمه بيكشفلك عن معدن الناس وعن حبهم وتقديرهم وخوفهم عليك اللي يمكن ما بتحسوش في الوقت العادي، والشكر الحقيقه مش للناس في مصر فقط ولكن في كل العالم العربي في الامارات والسعوديه والاْردن ولبنان، والعراق".
وكشفت لميس الحديدي لاول مرة عن هوية أربعة شباب كان لهم دور كبير في إنقاذ زوجها الإعلامي عمرو اديب للمستشفى وإنقاذه قائلة: " أنا هنا سأخص بالشكر 4 شباب بالاسم لانهم هم من قاموا بنقله إلى المستشفى"، مشيرة إلى أن هؤلاء الشباب وقفوا بجانبه حتى وصلت إليه وهم المهندس مصطفي عزب، والدكتور كريم النحاس، الدكتور طارق سلامه، المهندسة داليدا، معلقة: "الشباب دول انا ما عرفهومش، لكنهم تصادف وجودهم في نفس مكان الحادث ونقلوه المستشفى وفضلوا معاه لحد وصولي وكملوا معايا لحد ما اتطمنوا عليه.. الشباب دول انا صممت اخد أساميهم علشان اشكرهم بنفسي، فيه لسه ناس محترمه بجد".
وتابعت قائلة: " شكرًا لحبكم واهتمامكم ويا رب ماحدش يجي له حاجه وحشه ابدا، خللوا بالكم من الطريق لان الحوادث بتقع في ثانيه واحده، وربنا يحفظ الجميع".