اسمى مكتوب ؟!

إمبارح وأنا اعدة مستنية أجمل رئيس في عنيا يقول الخطاب والله حصلت حاجات كتيرة اوي.. أنا كنت محضرة ربع كيلو لب عشان أسمع وأتفرج وأنا منشكحة وبالي رايق.. لكن ربع كيلو اللب خلص واضطريت ادخل جوة التلاجة واتعشى بعلبتين كشري وأربع زبادي وكنت ناوية آكل أم على بس الحقيقة اتنكد عليا.. لأن الرئيس كان شكله شايل ومعبي اوي
ده حتى الراجل قال أسماء كل الناس اللي مزعلينه.. على علوكة وأشرف كخة وحسن سبانخ بتاع سلق القوانين.. بس الغريب بقى أنه عارف كل دول وما فكرش يقبض عليهم أو حتى يقعد معاهم اعدة عرب ونحل الخلاف ده
أما عن انطباعي الفريسكاوي بخصوص هذا الخطاب الذي طال أو قصر ما حدش فهم منه حاجة واللي بيفكرني مع الفارق طبعا بأفلام العظيم يوسف شاهين.. اعتقد هو الوحيد اللي كان بيفهم هو عايز يوصل لإيه
الرئيس إمبارح الحقيقة كان جاي ونيته خالصة لله.. يوقع كل الدنيا في بعضها.. ده ما سابش حاجة غير واتكلم عليها.. وكان متضامن جدا مع كل الناس اللي واقفة في طوابير البنزين وقال إنه نفسه ينزل معاهم وبما أن الريس يتمنى بس وما حدش يقدر يرفضله طلب.. فأنا من موقعي هذا باقوله انزل يا ريس وجركن البنزين هدية من عندي
وبما أنه ما سابش اسم حد انتقده ونسيني فأنا باقوله.. اسمي مكتوب ؟!