الفجر تنفرد ب اول لقاء مع مبارك بعد اخلاء سبيله

أحمد شاكر


مبارك : مريت بظروف صعبه , والشباب مازالوا الامل

احمد مراسل الفجر من علي باب المستشفي

المراسل : كفاره ياريس .. وحشتنااااااااا
مبارك : ربنا يخليك يابو حميد انتو اكتر
المراسل : شرف ليا اني اكون اول واحد يعمل معاك حوار ياريس
بعد البراءة
مبارك : انتا عارف يااحمد انا بحبك قد ايه
وخصوصا انك كنت مصيطني صور بروفايلات ايام الحجز
نضارات وصبغات وساعات , يعني بصراحه
مش عارف اودي جمايلك دي فى انهي داهيه
المراسل : دي اقل حاجه ياريس .. نبدأ الحوار ؟
مبارك : نبدأ ياحماده
المراسل : فى البدايه احب اعرف
انتا قضيت الفتره اللى فاتت دي ازاي ؟؟
مبارك : مش هكدب عليك يامادا الموضوع كان صعب عليا فشخ
لا كنت بعرف اكل ولا اشرب ولا العب بولينج ولا اخد الجاكوزي بتاعي , حتي تمرين الباليه المائي مكنتش بعرف اعملو ,, الاوضه كانت ضيقه ورجلي في الاطاله كانت بتطلع برا الشباك
بس الحمد لله يعني فتره وعدت , وربنا ظهر الحق وطلعت براءة
المراسل : وناوي علي ايه ياريس بعد البراءة ؟
مبارك : والله يامادا مش هكدب عليك , انا محتاج فتره كدا اخد وادي فيها مع نفسي
اشوف هعمل ايه الفتره الجايه ,, واعيد حساباتي
وخصوصا اننا داخلين علي انتخابات رئاسيه مبكره انا وحمدين فمش هبقا فاضي
المراسل : افهم من كدا ياريس انك ناوي ترشح نفسك تاني
مبارك : امال انا طالع ألعب بولينج يابو حميد ؟
المراسل : طيب ولحد ما الانتخابات دي تيجي .. انتا هتعمل ايه ؟
مبارك : بيني وبينك شرم وحشتني , هشد علي هناك اانتخ فيها كم اسبوع كدا فى الفيلا بتاعتي
المراسل : بس انا سمعت ياريس ان الحكومه خدتها
مبارك : خلاص اروح مارينا ... كان ليا كم شاليه هناك
المراسل : انا سمعت برده ياريس انه اتحجز عليهم بالصلا ع النبي
مبارك : الشاليهات كمان خادوها !
طب خلاص نطلع ع الساحل , عندي هناك عوامه اربع ادوار وسمعتين دي جي
المراسل : انا سمعت ان خيرت وبديع خدوها ياريس
مبارك : خدوا العوامه يعملوا فيها ايه ؟؟
المراسل : حفلات دوللي شاهين ياريس
مبارك : اااااااااااااه
كدا مفضلش غير قصر المنتزه وشاليه خالد ابن الوليد
وكم بحر كدا فى العصافره
المراسل : برده اتاخدوا ياريس ....... قلبوك يازعيم
مبارك كدا مفيش قدامي غير اني ارجع القصر الجمهوري بقا وخلاص
المراسل : مرسي خدو ياريس
مبارك : طب خلاص اقعد عند مرسي
المراسل : ماهو مديه لبديع ياريس
مبارك : امال مرسي قاعد فين يابو حميد ؟
المراسل : واخد ايجار قديم فى الخلفاوي ب 300 بلبل فى الشهر
مبارك : طب خلاص ناخدلنا حاجه ايجار قديم
واهو نلم سوزان والعيلين فيها
استناني كدا ياميدو ادي مسدايا لسوزي
الو .. سوزي حياتي .. انا فله ياقلبي
اه كلت وشربت الجوافه وحطيت الجرنال علي صدري
لا مش هاجي دلوقتى , معايا عيل غتت كدا
هقلبو سخان واجيلك
قوليلي .. هو احنا فاضل معانا كم مليار ؟
سوزان : مليارات ايه ياسنسن ؟
مبارك : فلوسنا ياروحي , اللى احنا كنا مقلبنها وكدا
سوزان : اتصرفو كلهم يانور عيني
مبارك : صرفتي ال 300 مليار يابلسم جروحي ؟؟
سوزان : مهم يادوب ياحبيبي الفتره اللى انتا اتعكشت فيها
مبارك : صرفتيهم في ايه ياقلبي ؟
سوزان : الحكومه قفشت عليا وخدت تلت تربعهم
والباقي خلص اتعاب محاميين
مقولكش ياحياتي .. الديب فشخني ف افكاري مصاريف
مفضلش منهم غير بتاع مليون ونص
مليون مصاريفي السنتين دول
اكل وشرب وجاكوزي ولبس وكوافير وباديكير
مبارك : خلصتي مليون علي الاكل والكوافير والباديكير ؟؟
سوزان : لا مهو انا عملت كمان مانيكير وتاتوه
مبارك : اه .. اذا كان كدا معلش ,, التاتوه بيصرف
والنص مليون الباقيين ياسوزي , غورتيهم فين ؟
سوزان : مصاريفكو ياروحي
الفراخ واللحمه والفواكه وصبغة الشعر
كل الفلوس اتصرفت عليك انتا وعيال ايام الزقططه
مفضلش غير ميه خمسه وسبعين جنيه
مبارك : طب تمام .. اطلبلنا بيهم عشا علي مااجيلك
سوزان : لا ياحبيبي , مهو انا دفعت 100 اخر قسط ف الجمعيه
مبارك : جمعية ايه ياسوزي ؟
سوزان : جمعية حقوق المرأة .. مهو انا كنت قبضاها الاول
بتاع ميت مليار ,, خدت مكتبة الاسكندريه
والجندي المجهول ودخلت شريك في جرين بلازا ومأجره قدورة دلوقتى مفروش
وكنت متكلمه علي قلعة قايتباي بس منهم لله
الثوار بقا ضيعو عليا الصفقه بعد ماهريت المسئولين رشاوي
مبارك : منهم لله البعدا .. المهم يعني فاضل معاكي كم ؟
سوزان : معايا بتاع 25 جنيه ياسنسن
مبارك : طب اطلبيلك بيهم واحد دينر بوكس سلطه كولسليه مايونيز
بس بلاش اسبايسي عشان ميحميش علي صدرك
واقفلي شباك المطبخ وريحي الشفاط وانا شويه وجايلك
سوزان : ماشي ياحياتي تيك كير
معلش يابو حميد اتاخرت عليك
المراسل : لا ولا يهمك ياريس
مبارك : بس ياسيدي .. ناوي ارجع تاني بلدي
اشم هواها وامشي فى شوارعها
مصر وحشتني اوي يامادا
تعرف .. كنت زمان بمشي فى وسط البلد
انا وجيمي ولوقا وصاحبهم العفريت مادا
ياااااااه كانو مطلعين عيني
جيمي كان شقي اوي وهو صغير
كان يصحي كل يوم الصبح ياخد صحابه
ويروح يلعب فى الحزب , اجيبه واضربه
واقلو كدا كخه .. وهو راسه والف سيف يوزع الكراسي علي صحابه ويقعد هو ع الكرسي الكبير
ولما كبر ادتهولو بقا عشان يطلع من دماغي
اما لوقا كان لذيذ موت , كان هادي كدا وطيوب
كان غاوي شركات .. كانت مامته تاخدو وهو صغير
يروح يشتري شركات المقاولات والسياحه
ويرجع يفرجني عليهم ,, ولما كبر
سيبتو يشق طريقه , ولد مجتهد ويستاهل
اما صاحبهم الزقله الصغير مادا
كان غاوي يلعب حديد من صغره
كان ليل نهار فى الجيم ,, لدرجة انه لما كبر
قرر يلم كل الحديد اللى فى البلد , ويروح يلعب
بيه مع جيمي فى الحزب
ولا سوزان .. كانت تسيبني ليل نهار من غير اكل
ودايره تلفلي ع المنظمات وتفتحلي فى مدارس ومراكز شباب
المراسل : وانتا كنت بتعمل ايه ياريس ؟؟
مبارك : هعمل ايه يعني ؟؟ كنت مقضيها تونه
المراسل : توووونه ياريس ؟؟
مبارك : لا يابني دي صن شاين قطعه واحده زيت
المراسل : اه .. اذا كان كدا معلش
مبارك : بقولك ايه ياميدو .. استنا اشوف اي حد من
العيال يجي ياخدني , لحسن ابتديت اتخنق منك انتا شخصيا
الو .. ايوه ياطارق , معلش اديني وائل
النور مقطوع ومش لاقيه ؟؟
معلش حسس كدا وادهوني عشان عايزه ضروري
ايوة ياوائل , تعالي ياحبيبي خدني عشان
واقف فى الشارع .. العربيه مفهاش بنزين ؟
ماتروح تمون ياوائل .. مفيش بنزين فى المحطات
طب اديني رقم ابوك
ايوة ياحج , الحمد لله ياحج ربنا يخليك , اخلص ياحج انتا هترغي
انتا فين ؟؟ في المهندسين .. طب ماتيجي تاخدني
الطريق واقف وفيها تلت ساعات
طب ماتكلم سمير يجي ياخدني
سمير اتثبت ع المحور وقلبوه ؟؟
اقفل ياحج وامسح رقمي
معاك يابو حميد , معلش بقطع كلامك
المراسل : ولا يهمك ياريس .. نكمل
شايف مصر ازاي ياريس بعد الثورة ؟
مبارك : والله مصر هتفضل عظيمه بولادها
اينعم هما فشخوني السنتين اللى فاتو , بس برده هما زهرة البلد
اي نعم نصهم راح وربعهم محبوس والربع اللي فاضل هيحصلهم
بس برده ملناش غيرهم
استنا ياحمد معلش
الو .. ايوة ياسوزي
سوزان : سنسن انا كنت مخبيا حاجات كتير حصلت فى البلد
لكن دلوقتى جه الوقت اللى لازم اقولك فيه الحقيقه
احسن ماتعرف من برا
مبارك : فيه ايه ياسوزان ؟؟
مصر مكنتش كويسه زي منا كنت بوصلك
البلد مولللللللللعه
الناس بقت تكره بعض والشعب اتقسم وبقا فيه حروب اهليه
اخوان وثوار فلول واحزاب التراس وجرين
دا غير ان البلطجيه اشتروا البلد والمؤسسات اتحرقت ومبقاش فيه امن ولا بقا فيه موارد والسياحه اتضربت والاعلام باظ وابو اسماعيل بيعمل اعتصام كل تلت دقايق
مبارك : معقووووووووول !!
اللي عملتو فى تلاتين سنه فساد يروح بسهوله كدا فى تمن شهور فوضي ؟؟
سوزان : مش كدا وبس ياروحي
دا غير ان المنتخب بقاله تلت سنين مبيدخلش بطولات
والاهلي بقا يخسر والزمالك متصدر المجموووووعه
دا غير انهم مشو شحاته وجابو برادلي
مبارك : اقفلي ياسوزان معايا ويت
ورقة طلاقك هتوصلك بعد نص ساعه
الو .. ايوة ياسيادة المستشار
الله يبارك فيك
لا كلو تمام .. الله يخليك انا كان ليا طلب
كنت عايزك تجددلي سبعتاشر تمنتاشر سنه كمان
اه حبس علي ذمة التحقيق .. لا غرفة واحده
لا براءة ايه .. مهو فيه اعترافات جديده
ورقه وقلم واكتب عندك
انا اللى قتلت الثوار
موقعة الجمل ؟؟
ايوة الجمال والحصنا كلهم بتوعي
كنت مخلص فيهم مع احمد مظهر بعد فيلم الناصر صلاح الدين .. المولات ؟؟
اه انا اللى حرقتها كلها .. والسجون انا اللى فاتحها اه
مفاتيحها معايا ياعم هوريهملك لما تقبضو عليا
فريد الديب ؟؟ لا دا مش محامي اصلا
دا شريك معايا
فين الدليل علي كلامي
لما اجيلك هبقا اقولك فين
حضرلي الحبس .. انا راجع