نشطاء تويتر يعبرون عن غضبهم بهاشتاج "خطاب مرسي".. "ساويرس": الشارع صاحب القرار.. "أبو حامد": موعدنا 30 يونيو.. "لميس": قناة مصر 25 والحافظ إعلام كويس.."بدوي": ملخص الخطاب "محدش يناقشني أنا الكوتش"

حالة من الغضب المصحوب بسخرية ظهرت في تعليقات النشطاء على "تويتر" بسبب خطاب الرئيس مرسي، الذي استغرق أكثر من ساعتين، لدرجة أن البعض وصفه بأطول خطاب في موسوعة جينيس للأرقام القياسية، وقام النشطاء بتدشين هاشتاج "خطاب مرسي" للتعبير عن هذا الغضب.
في البداية.. قال رجل الأعمال نجيب ساويرس: "الحمد لله أن الشارع هو صاحب القرار!"
وقال البرلماني السابق محمد أبو حامد: "تهديد بالقانون العسكري يا مرسي.. موعدنا 30 يونيو وهو يوم الحسم.. محاولة مستميتة لرشوة الشباب ولكن من سعى لجمع ملايين التوقيعات حتى يخلعك لا يرتشى".
وقالت الإعلامية لميس الحديدي: "أنا مقصدش الإعلام كله.. في إعلام كويس قناة مصر 25.. والحافظ.. كده يعنى افهموا بقى!!.. مرسي يهاجم قناة سي بي سي ومالك قنوات CBC محمد الأمين.. يبقى جود لاك يا باسم يوسف".
وقال سعد عبدالنبي: "خطاب مرسي يعتبر دعوة عامة للنزول يوم 30 يونيو".
والناشطة الحقوقية راجية عمران قالت: "هل جاب سيرة جريمة قتل الشيعة من يومين؟.
رولا محمود: "كل الأسماء اللي ذكرها مرسي وسخر من أصحابها هما اللي طلعهم براءة وبدون كفالة وبدالهم حط شباب زي الورد في السجون.. حسبي الله.. اللي بيته من إزاز مايحدفش الناس بالطوب يا ريس".
كريم بدوي: "ملخص الخطاب: "أنا قائد القوات المسلحة.. أنا قائد الشرطة.. أنا الكوتش يا ولود ال.. محدش يناقشني أنا الكوتش".
عم عز الدين شقلباظ: "بصوا إحنا ندلق البليلة اللي كانت في السلطانية الكبيرة ونجيب سلطانية أكبر ونملاها حلبسة".
رامي خضير: "وأنا في طريقي للبيت سألت صاحب محل الفكهاني اللي جانب البيت أنت بتسمع خطاب مرسى؟ قالي: "آه بيغتاب شفيق!".
أحمد خالد الصباح: "عاجل وزارة الصحة المصرية توافق على إرسال "مترجم" خطاب الرئيس مرسي للعلاج في مستشفى جون هوبكنز وذلك بعد إصابته ببحة دائمة بالصوت".
ياسمين سليمان: "الفاشل هو اللي يتكلم عن أخطاء الآخرين بدل ما يتكلم عن إنجازاته".
أبانوب مجدي نظير: "ملخص خطاب مرسي: 1- أديك تقول مخدتش! 2- بتستعماني يا هرم؟ ! 3- بحبكوا كلكم".
نورا وفيق: "خطة التخلص من شعب مصر: a) فقع مرارة اللي في البيت بالخطابات b) تسييح دم نص اللي ف الشارع c) سجن النص التاني".
أبو فارس: "أكثر حاجه ضحكتني في خطاب الرئيس لما قال باسم عودة بينط على عربيات الأنابيب".
خالد كيلاني: "أنا مسمعتش الخطاب ولا عايز أسمع خطاب مدته ساعتين ونص.. إحنا سمعنا خطابات كتيرة تفقع وكفاية علينا كدة".
عمرو العناني: "أول رئيس في العالم يبدأ الخطاب يوم الأربعاء ويخلصه يوم الخميس.. عاش الريس".
مصطفي أهلاوي: "هما اللي اتفقعوا من خطاب مرسي يعتبروا من مصابي الثورة ولا إيه؟".
حليمة مظفر: "خطاب مرسي تخوين الناس أو التحريض على من كانوا مع النظام السابق أمر لا يقدم لمصر سوى مزيد من الانقسام".
دكتور باسل مجدي: "أنا لو مكان الراجل بتاع الصم والبكم اللي بيترجم خطاب مرسي أحرك صباع واحد بس".
فاتن الحمدان: "أنا أتوقع أن في أي لحظة ممكن تتفتح قبور الفراعنة العظماء بسبب خطاب مرسي ويطلعو يربوه.. لأنه عار سياسي على دولة كبيرة عظيمة كمصر!".