كل أسبوع

ارجع.. ياريس باينها طلعت بجد.. ياريس

12 يوما ولاحس ولاخبر.. ولاحتي تليفون واحد ياريس مرسي؟!
سيبك من اللي بيقولوه عليك.. واسمع لي أنا: واحد من الناس.. لا له في التور ولا في الطحين.. سيبك من الناس اللي بتحكي وتتحاكي عن إنجازاتك في: طوابير الخبز والسولار والبنزين وانقطاع الكهربا.. وأزمة مية النيل مع أثيوبيا والاجتماع السري العلني الشهير عندك في الرياسة سيبك من الحاقدين اللي بيتكلموا ويعملوا مكلمة عن الجنود اللي خطفوهم في سينا.. وإخوتهم الستة اللي راحوا ورجعوا في مسرحية شهيرة.. قالوا إنك مخرجها ياريس؟! سيبك من كل كده.. وقوللي فين الناس الحلوة اللي كانوا حواليك..
منورين الدنيا يابرنس؟ فين المرشد الحالي د.بديع؟ وفين المرشد السابق مهدي عاكف بتاع طظ في مصر؟ وفين العريان اللي كان عاوز إخوتنا اليهود يرجعوا يعيشوا بينا زي زمان؟ وفين البلتاجي الراجل القيمة والسيما؟ وفين د.صفوت حجازي اللي كان بيقول اللي يرشك بالمية حيرشه بالدم.. وطلع في الآخر لا أحنا عندنا مية.. ولا هو عنده ».....« ياريس؟ وفين الراجل الكوميدي الساخر د.البرنس اللي كان ناوي يحل مشكلات المرور والوقود بالإسكندرية بضربة واحدة.. ويركب الناس البسكيلتة؟ وفين قبل ده كله خطاباتك الرنانة ياريس وعباراتك الشهيرة زي »لجلج وأبلج« و»فيرس نوت أجنست و»نوت ميكس«؟! وفين صباعك الشهير ترفعه في وش عدوينك؟! قول ياكريم وأرجع ياريس معلهش.. إحنا شعب رذل ورخم وقليل الأصل.. وده كله مش جديد علينا.. ده عمره 7 آلاف سنة بالكمال والتمام.. إرجع ياغالي.. ونور قصرك زي زمان وما يهمكش من الحاقدين والفاسدين والمفلسين حتي ولو كانوا عشرات الملايين ومش مجرد 3 أو 4 في الحارة المزنوقة.