"الريس حنتيرة".. قصيدة مشتركة لمصطفى مقلد وعادل أبوعبا

فى موقف لا يكاد يحدث إلاّ قليلًا، ضفّر الشاعران مصطفى كامل مقلد وعادل ابو عبا همهما، لينتجا نصًا شعريًا مشتركًا يحمل عنوان "الريس حنتيرة".
مصطفى وعادل شاعران من أبناء مدينة دسوق بمحافظة كفرالشيخ - من أعضاء اتحاد كتّاب مصر - سافر أحدهما للخارج، لكن الهم الوطنى وأوجاع الأمة، كسرا حواجز البلدان بينهما فاتحدا وجدانيًا ليكون هذا النص:
سمعنا ياريس حنتيره
للصبح معاك السهيره
سمعنا يا ريس يا كويس
بيقولوا عليك انك كيس
انا شايفك رايق ومهيص
وكانك واخد تعميره
سمعنا ياريس حنتيره
.......................................
سمعنا وشاور بصباعك
هتخاف من ايه احنا سباعك
نتحمل مغصك وصداعك
سمعنا كمان مره اخيره
سمعنا يا ريس حنتيره
.......................................
سمعنا ياريس يا راعينا
في حلايب وف توشكا وسينا
وف اي شوارع ومدينه
هيموت العالم م الغيره
سمعنا يا ريس حنتيره.
......................................
سمعنا يا ريس نهضاوي
يا مخرج م السجن بلاوي
ومفتح جرابات الحاوي
دول هما حبايبك والخيره
سمعنا يا ريس حنتيره.
......................................
سمعنا ولم الهتيفة
الدنيا جميله ولطيفه
داحنا اللي خرمنا التعريفة
وطلعنا في قلب التصويرة
سمعنا يا ريس حنتيره
............................
سمعنا يا ريس اسمنتي
ورينا المشهد بالسنتي
وفي قلب الجون حط بلنتي
ما تفوتش الهجمه خطيره
سمعنا يا ريس حنتيره
................................
سمعنا يا آخرة صبر الناس
واحنا نردد وياك وخلاص
يامخرج مصر من الإفلاس
يا معيشنا ف خزنه كبيره
سمعنا ياريس حنتيرة
..............................
سمعنا ياريس يابن الايه
جبهة انقاذ وتمرد ايه
انت اللي جميل والكل اخيه
دانت المرهم للتعويره
سمعنا يا ريس حنتيره
.........................
سمعنا ولم الهتيفة
الدنيا جميله ولطيفه
داحنا اللي خرمنا التعريفة
وطلعنا في قلب التصويرة
سمعنا ياريس حنتيرة
............................
سمعنا يا ريس مش قاتل
ولا عمرك ف الحق تماطل
ولا تخلط بالحق الباطل
واحنا هنسبكها بتكبيره
سمعنا يا ريس حنتيره
.............................
سمعنا يا ريس مش كذاب
ومثقف حافظ كل كتاب
احلف انا باخد بالاسباب
ما تجبش عن المرشد سيره
سمعنا ياريس حنتيرة
........................
سمعنا يا ريس تحت وفوق
احاكمنا بأصوات الصندوق
هيملو اوام والحاله تروق
اهي خيره وجات ف التأخبره
سمعنا ياريس حنتيرة
...............................
سمعنا يا ريس يا برنسيس
طلع امجادنا من الكواليس
الحق حمدين امسك يا بوليس
لبس حمدين تهمة خطيرة
سمعنا ياريس حنتيرة
..............................
سمعنا وقول واخطب وادعى
تنتص ف نضرك يا برادعي
يا اعور يافلول ياكيان رجعي
هتخش النار بلا تأشيره
سمعنا يا ريس حنتيره
...................................
سمعنا وعدد انجازك
وريهم اية اعجازك
اخلط بنزينك على جازك
دخلنا معاك ف البندير
سمعنا يا ريس حنتيره
..............................
سمعنا يا ريس بالنيه
دخل غربان ف البنيه
الخيبه ماهيش خيبه قويه
الحاله ماهيش جد خطيره
سمعنا يا ريس حنتيره