آخرة الجواز العرفي..!

خير يعني اللهم اجعله خير اعده باتفرج على مواقع الهري الاجتماعي المتواصل اللي لا بيتقطع هريها بقطع النور ولا حتى قطع كابلات النت في البحر.
لقيت واحد متصور بصورة حلوة كدة وكاتب عليها قال إيه اللي اتجوز شرعي ما ينفعش يطلق عرفي.. قال يعني هي مصر كانت ناقصة جواز.. دي عجزت وأي حد فكر يتجوزها أكيد كان طمعان في ثروتها.
وبعدين يعني إيه اللي دخل الجواز دلوقتي في المليونية يعني.. باقولك إيه يا عمنا.. جاز والكحول " دونت ميكس " وإلا هتبقي حالتك زي حالة أخينا ده اللي مش بيفكر في أي حاجة غير إنها علاقة بقي بين ست وراجل.. حتي لو كانت جواز يعني لازم دماغه تروح ناحية العرفي..
وبعدين لو جينا للحق بقي هو ما اتجوزهاش شرعي.. ده كده يبقي اتجوزها عرفي لأنه خبي عليها أنه كان متجوز 3 غيرها " بديع -اوباما - بيريز ) والإثباتات والدلائل كلها موجودة ولو كنتوا نسيتوا اللي جرا نجيب " الجوابات السخنة " تتقرا.
وبعدين هو حد جاب سيرة طلاق أصلا.. ما حدش يقدر يجيب أي سيرة طلاق.. ما هو ما دام ماجابش منها عيال يبقي نحمد ربنا على كدة
و الخلع هو الحل.. ومش هتفرق بقي الجوازة شرعي ولا عرفي.. سلامات يا حاج !!