الدخول على الحاكم!!

فلقونا أيام الثورة الأولى لما كانوا لسه خايفين وما اتفقوش على تقسيمة التورتة.. الخروج على الحاكم حرام والخروج على الشرعية حرام
وشوية وفجأة وطلعوا إن الكلام ده في حالات معينة أما بقى إذا كان الحاكم ظالما ومستبدا وكافرا فإن الوقوف في وجه سلطان جائر دي أحسن حاجة ممكن تعملها في الدنيا، والظاهر إنهم بعد سنتين بس نسيوا اللي كانوا بيقولوه.. دلوقتي بس رجعوا تاني يفكرونا بالشرعية والشريعة وإنهم أصحاب الاتنين وخدوهم كده وسابونا إحنا حافيين لا معانا شريعة بعد ما كفرونا ولا معانا شرعية بعد ما خدوها لوحدهم، وجابوا الشيخ إياه اللي بيزور مصر في الأوقات العصيبة واعدين يكلمونا عن الشرعية والخروج على الحاكم، وأنا من موقعي هذا أحب أقولهم إن المظاهرات اللي هتيجي في 30 يونيو مش قصدها خالص، أبسلوتلي، الخروج على الحاكم، وعلى فكرة كلهم معترفين كمان إن الخروج على الحاكم حرام شرعا
عشان كده كلهم قرروا ما يخرجوش على الحاكم.. ويعملوا عكس كل ما هو حرام حرام حرام.. عشان يبقوا ماشيين حلال
هما هيدخلوا على الحاكم في القصر.. وده طبعا ما فيهوش أي خروج.. وحلال.. عندك مبرر تاني؟!!