اللي بيته من "إزاز"

عيسي نبي وموسي نبي ومحمد نبي وكل من له نبي يصلي عليه.. بعد ما بدأنا بالصلاة على النبي لازم نعرف أن احنا المصريين فينا عرق عند ما حدش بيعرف يقلدنا فيه.. حتي الطلاينة لما حاولوا حرقوا روما وكانت أزمة كبيرة أوي.
الأنبياء بس هما اللي معصومين من الخطأ ولما يكون عندك مشكلة وغلطت في حاجة لازم على الأقل تعترف بالخطأ بينك وبين نفسك وما تفكرش تقاوح كتير عشان كل ما تقاوح كل ما الغلط بيكبر.
وزير مش بس غلطان.. ده عليه سي دي وكلام غرامي ع الفيس بوك وكل إمكانياته أنه بيعرف " يمنتج " يعني يقص ويلزق الحاجات جمب بعضيها.. مع كل الاحترام لكل اللي بيمنتجوا مع أن فيهم عظماء كتير لكن حتي دي هو مش فنان ولا مشهور فيها يعني ما ينفعش أجيب طبال لسه يا دوب بيتعلم على واحدة ونص وأعينه كبير الطبالين لأن أكيد الطبلة هتقلب بوجع دماغ.
نهايته يعني.. ومن غير لت وعجن.. لما تبقى وزارته قالبة عليه ومش عايزاه ويقيل نصها في أسبوعين من توليه الوزارة يقوم يطلع يقول هاعمل شغل وزارة الثقافة اللي هو باليه ورقص استعراضي وفن تشكيلي وتجريدي وتكعيبي وشعر وأدب وتمثيل ومسرح وسينما من جامع عمر بن عبد العزيز لا والأدهى والأمر أنه يقول أن اللي بيقفوا ضده " كفرة " ويحرض ضدهم.. بس المشكلة أن الناس المثقفين دول محفلطين أوي بيهاجموا الوزير بالأغاني والرسم والموسيقى والحاج صاحب البيت عشان له قرايب مهمين عايز يتهمهم بأي حاجة وخلاص والناس دي ما بيتخافش منهم واللي بيته من إزاز ما يخافش من الأغاني لازم يخاف من " الطوب ".