الشوري والا الدستور، البيضة والا الفرخة

هاتجن يا ريت يا إخواننا ما شفتش لندن ولا باريز دي بلاد تمدين ولطافة وذوق ونضافة وحاجة تغيظ، ومن امبارح الناس كلها فرحانة قال ايه: تركيا بيعملوا مظاهرات شبهنا وعندهم خرطوش زينا وعندهم غاز ومطاطي وقعدوا يتكلموا على المظاهرات اللي مليانة مزز وفساتين وآخر موضة، طب أهيه المحكمة حكمت ببطلان الشورى هنعمل إيه بقى دلوقتي.
لسة هنهد ونبني من الأول.
طب حد يفهمنا ويقولنا حل الفزورة ويقولنا مين اللي جه على حس التاني، مجلس الشورى جاب الدستور فلازم الدستور يتشال لما يتشال مجلس الشوري وساعتها لازم حد يحاسب على المشاريب ما هو أكيد أعضاء المجلس شربوا شاي وقهوة وعناب ساقع في الحر ده كتير أوي
أو الإعلان الدستوري اللي جاب المجلس، اللي جاب الدستور، فكده معناه إن الحساب مش هيبقى على المشاريب بس هتبقى العملية دخلت في غد
والرؤساء اللي اتعزموا وعزموا ومستنيين رد العزومة كلهم نقبهم هيطلع على شونة.
يعني الفرخة جات من البيضة والا البيضة جات من الفرخة وسمعني أحلى سلام دوخيني يا ليمونة دوخيني !