وحياة طنط كيما

مشهد رشدي أباظة وهو يصارع الموت ويبوح للرجل الأول بسر طنط كيما، اللي عمره ما حلف بحياتها كدب.. وإن كل الأوراق والمستندات اللي تدين الرجل الأول موجودة عندها وهو الرجل التاني!! مش عارف ليه افتكرته مع هوجة سد النهضة.. أيوة هوجة..
إحنا شعب بتاع هوجة.. كل يوم في حاجة تلاقيها شاغلة الناس.. وبعد أسبوع أصبحت من الماضي.. لما بفتكر أزمة الجنود اللي يا حسرة عليهم اتخطفوا ورجعوا.. باحس إنها كانت السنة اللي فاتت من كتر ما بعدت عن الضوء.. مع أنها مافتش عليها أسبوع وهوب حل محلها سد النهضة الإثيوبي.. وهيتنسي وهييجي غيره..
وهكذا دواليك لحد ما نلاقي نفسنا بعد الأربع السنين بتوع الرئاسة يكون الملف اللي عند طنط كيما بقى ولا دار الكتب من كتر الدوسيهات اللي موجودة فيه.. إشي موضوع الاتحادية على أزمة المية والكهربا.. على حماس على الجنود اللي اتقتلوا وزمايلهم اللي اتخطفوا.... وكتييييييييييييييييير من الدوسيهات اللي مستخبية عند طنط كيما.. دي بقى نصاحة يستاهل عليها دكتوراه في الفلسفة مع طاقية من الحجم العائلي.. مش غباوة يعني خدوا بالكو..
يعني إعمل حسابك منك له لو طارت رقبتي هجيب رقبتك أنت كمان.. والناس عارفة إنك المرشد الكبير.. قصدي الراجل الكبير.. لكن عشان حبكة الفيلم تبقى كويسة فممكن طنط كيما دي تكون اسم حركي لكادر من الكوادر بتاعة الإخوان يعني مش شرط تبقى واحدة ست يعني.. يعني في الآخر ممكن يطلع الشاطر مثلا هو طنط كيما.. وبكدا نخش على فيلم تاني لما شكري سرحان في نهاية الفيلم بيقول وهو مصدوم بقى أنت يا عصفور رئيس العصابة.. وعصفور يرد عليه ويقوله بتزن بتزن زننننننننننننننننن.