المية هتبقي بالكوبونات!!

نهيتك ما انتهيت والطبع فيك غالب.. وديل النهضة عمره ما يتعدل ولو علقوا فيه قالب..
اجدع واحد في مصر اليومين دول اللي يعمل دكتوراه في النهضة.. زي الدكتوراه في حتى بتاعة صديق البرنس في الأيدي الناعمة..
من يوم ما قالوا يا نهضة وما شفناش يوم حلو.. هي بس ريحتها عدت علينا حوادث قطارات على قتل جنود على شبه حرب أهلية على فتن طائفية وغير طائفية والحلو.. خطف جنود.
حتى تونس ما سلمتش من ساعة ما بقى عندهم حزب النهضة وما حدش سامعلهم حس.. وبتوع النهضة أعدوا وسيطروا وأنتخوا ودلدلوا رجليهم..نهضة دي ولا مش نهضة؟؟
بس دلوقتي فعلا اللي هيخرج من مجمع اللغة العربية ويقولنا تاريخ كلمة نهضة دي وجات علينا من أنهي داهية ومش عارفة حاسة إنها بحرف "الضاد " اللي واكل وشها وقفاها ده كلمة " تركية " واللي أنا بقي واثقة منه أنها أكيد كانت بتتقال كتير أوي أيام السخرة للناس عشان يحفروا القناة.
حتى السد اللي بيتبني هناك.. ما اتحركوش يفعلوا الاتفاقية بتاعته غير لما النهضة عملت قافلة.. يعني كان لازم مسئول النهضة المصرية يزور النهضة الأثيوبية عشان يبدأوا ينهضوا علينا ويشغلوا سد النهضة.. اللي باذن الله هيخلي كل المصريين ينهضوا من الصبح بدري أوي عشان يقفوا في الطابور.
..بس المرة دي مش طابور الجمعية عشان الفراخ واللحمة والكسوة الشتوي والدقيق زي الستينات ولا طابور الزيت والصابون زي السبعينات ولا حتى هيحصلوا طابور العيش اللي أثبت كفاءة وامتد من الثمانينات إلى الألفينات.. المرة دي بقى هيبقى طابور "المية".
ومش بعيد يطلعولنا بافتكاسة ويعملولنا كوبونات مية.. أو كروت ذكية وتصرف المية بتاعتك مرتين في الأسبوع ولو عطشت اشرب من " البحر " والحما هيبقى حسب الوظيفة وكله بالكارنيه.
ومن نهضة لنهضة يا قلبي لا تحزن "لأنك هتموت عطشان بعد ما كنت شرقان".