احمد عفيفي يكتب: ياحلاوتك ياجمالك .. خليت للحلوين ايه!!

شفتوا " صباع " الريس مرسي اللي بدأ يستخدمه مبدئيا للتخويف والترهيب .. والله اعلم بعد كده ممكن يستخدمه في إيه تاني .. ماحنا خلاص بقينا ركوبة كل اللي عايز يركب ويدلدل رجليه .. خلاص عرف الإخوان ومرسي " ديّتها " .. كام الف في الميدان يبخّوا بكام كلمة وبعدين حيروحوا .. من يومين قتلوا جابر صلاح واصابوا اكثر من 200 نفر .. ومفيش مشكلة بعد يومين نقتل كام واحد تاني لحد ما الكل يخاف ويكش " ويتلأح " في بيته زي الولايا .. ميحطش منطق.

بس على فكرة مش هى دي الحقيقة .. بمعنى ان مرسي عرف أخرنا .. بدليل انه خاف يخاطب الشعب كله من شاشة التليفزيون بتاع الدولة ، وخرج يخاطب الكام الف اللي اتلموا بالتليفون في عربيات وجم لحد باب الاتحادية .. هما دول بس اللي مرسي ميخفش على نفسه وسطهم .. لأنهم ببساطة .. بتوعه .. بس الكلام ده ميلقش برئيس جمهورية .. يليق بفتوة في الحارة .. حامي ضهره بالناس اللي حواليه اللي بيأمن مصالحهم .. وبالتالي يضمن ولاءهم له والسمع والطاعة .. انما رئيس جمهورية لازم - لو واثق من نفسه - يواجه اللي بيقولوا له لأ قبل اللي بيقولوا نعم .. ميخفش منهم .. ده لو واثق من نفسه وعارف هو عمل ايه وعمل كده ليه.


اما كلام المصاطب .. واللي فاكرين نفسهم متغطيين وانا شايفهم .. وكانوا ناويين ع الشر .. ووحياة امي مايحصل ابدا .. ومش مرسي اللي ياخد على قفاه من شوية عربجية .. ده كلام مينفعش يقوله رئيس جمهورية .. حاجة زي كده حصلت .. ناس مثلا مجتمعة في حارة ولا خرابة وبتخطط للشر وعايزة تقلب التربيزة على دماغك .. وانت عندك كاميرات وأمن الدولة رجعته تاني .. على طول اقبض عليهم وخلّينا نشوفهم عيني عينك من غير إعلان دستوري ودوشة دماغ .. ده لو انت رئيس قوي .. وكمان مرة واثق من نفسك .. لكن اللي اتعمل ده وقلب الدنيا رأسا على عقب .. عيب .. والله العظيم عيب .. مش شعب مصر اللي قام بثورة يبقى في نظرك غبي للدرجة دي .. مش كلب بترمي له عضمة عشان يسهى عن بلاوي سودا عايزها تمر .. تضحك علينا بإعادة محاكمة قتلة الثوار ، وانت مش من حقك قانونا انك تحاكم واحد في نفس الجريمة مرتين .. وابقى قابلني - ده بفرض انك حتعمل اللي بتقول عليه - .. ابقى قابلني لو حد في المباحث قدم لك دليل واحد يودي صاحبه السجن او يوديه هو ابو زعبل .. هى دي العضمة اللي بترميها لنا - بفرض انك متصور اننا كلاب - عشان تشيل النائب العام .. " يغور النائب العام في داهية .. بس مش بالطريقة دي اللي بتدوس بيها على القانون بأوسخ جزمة عندك " .. بس الأهم من النائب العام طبعا الدستور اللي عايزه يطلع ويخرج للوجود بسرعة والشعب يقول عليه اه .. بالترهيب.. بالترغيب.. بالضحك عليه بالجنة والنار .. بعلبة سمنة وكيلو سكر .. ب " لباسين " للعيال العريانة عشان ميستهوش .. المهم يقولوا نعم ونخلص من الليلة السودا دي.

هو الدستور .. اللي انت عملت الشويتين بتوعك دول عشان يمر رغم انف الجميع .. للدرجة دي الدستور مليان بلاوي زرقا عايزها تخلّي ايامنا اللي جاية معاك اسود من قرن الخروب .. ليه انت اشتريت مصر تشطيب ع المفتاح .. مش عايز حتى تدّيها وشين بوية تمسح بيهم الوساخات بتاعت اللي كان قبلك؟ .. ودفعت فيها كام ياعم مرسي .. واخدتها تمليك ولا إيجار جديد .. وناوي " تعرٌق " السمسار بكام .. انا لو منك اديله عمري .. انا كنت فين وبقيت فين!

صحيح تستاهل ياريس مرسي الأغنية دي : ياحلاوتك ياجمالك خليت للحلوين ايه .. ولو انت غاوي أفلام ابيض واسود بتاعت زمان حتضحك اوي لو عرفت فايزة احمد كانت بتغنيها لمين .. لاسماعيل يس .. تصدق اسماعيل يس يتقال له ياحلاوتك ياجمالك خليت للحلوين ايه؟!

ناوي على ايه ياسيادة الرئيس .. وواخدنا معاك لحد فين .. او عايز تجرنا وراك زي الخرفان بتوعك على فين .. عموما انت معاك الشرطة والجيش .. واحنا معانا - بعد ربنا - الحق .. واللي يسكت على انت عملته وناوي تعمله يبقى يستاهل - على رأى ابراهيم عيسى - يروح الخرابة .. وساعتها مش حيقول زي حجا : مادام بعيد عن " ... " يبقى مفيش مشكلة .. لأنه ساعتها مفيش حاجة حتبقى بعيد عن " ... " ياجحا .. وانت وشوقك بقى .. عاجبك " ال ... " .. براحتك ياعم .. حاسس انك راجل وميتعملش فيك كده .. وريني شطارتك ياجدع!