"أول طريق الحُب خُوف".. للشاعرة فاطمة المرسى

يا وطني يادربي
تايهه ومن قلبي
خايفه من الضلمة
تزعق على دارنا
طال الطريق بيَّا
واتلموا نحوّا
شُطَّار وحراميّة
سرقوا الأمل مني
حبَّك صَبَحْ همِّي
صُوت الفراق دمعَة
وعملْت مش سامعَة
أصل الفراق حرّاق
وأنا قلبي مات مشتاق
بين الكفوف وِشّي
عَ الجرح قلت امشي
يا قلبي يا مسافر
في طر يق ملوش آخر
ضاق الوطن بينا
بالذل مارضينا
ثُورنا وعدِّينا
جِسر الأسى والخُوف
والعُمر كان مخطوف
يا مراكبي يا معدِّي
بين الشطوط هدِّي
خدني على بلدي
بلدي بتتحنَّى
للعيد بتستنى
مشتاقه للأعياد
ياعم ياصياد
صيد القلوب غِيَة
والحُب مِلاغيَّة
في الفجر بُلطيّة
ترقص على الميَّة
والميَّه شرقانة
عطشانه حُريَّة
وانا وطني صيَّادي
رِسمالي وحصادي
وعرفت أنا دربي
مشياه على عنيَّة
....................
من ديوان مَوْلِد السيدة مصر