الإخوان: حركة تمرد جمعت توقيعات لتأييد «العياط»!

محمود ياحوستى صارخا فى زملائه : مصر هاتفضل غالية علىّ، بالروح بالدم نفديك يا شهيد
زملاؤه المتظاهرون يرددون فى حماس : مصر ها تفضل غالية عليا ، بالروح بالدم نفديك يا شهيد
سامر سيكا صائحا فى جموع المتظاهرين فى خطبة عصماء تلهب المشاعر : لحد إمتي ، لحد إمتي يا مصر هاتفضلي ساكتة وخيرة ولادك بيروحوا منك ، الشيخ عماد عفت ، أسامة احمد ، أنس ، جابر جيكا ، أبو الحسن ، الحسيني ابو ضيف ، محمد كريستى ، الجندى ، كريم بنونة ، احمد بسيونى ، سيد بلال ، خالد سعيد ، سالى زهران ، كريم جنيور ، مصطفى عصام ،غندور ، المجد لمن وهبونا الحياة ... المجد لمن علمونا الانتماء .. المجد كل المجد للشهداء ، القصاااااااص.
المتظاهرون بصوت هادر كالإعصار : القصاص ، القصاص.
ياحوستي يتناول الميكروفون قائلا : يا جماعة احنا هدفنا نجمع أكبر قدر من توقيعات الشعب المصري الأصيل لكي نسقط الديكتاتور الجديد وأهله وعشيرته ، أخويا سيكا هايوزع عليكم النماذج اللي هانجمع عليها التوقيعات عشان جهادنا السلمي المقدس ، وزع ياسيكا عليهم النماذج وقعوا يا جماعة وقعوا ... خلاص يا مصر ساعة الخلاص جاية ، والنصر قريب بإذن الله .
يبدأ المتظاهرون ومن التف حولهم من جموع الشعب المقهور الحالم بالخلاص بجمع التوقيعات لإسقاط الرئيس ، والدعوة لانتخابات رئاسية مبكرة ، ينضم إلى الجموع شابان مبرشمان يتطوحان يخاطب أحدهما الآخر :
- إلا الأكادة مصر دي منحوسة يا جدع ، وعاملة زي الست الفقرية اللي ما بيعيشلهاش اجواز !!
الثاني متفهما : ليه بتقول كده يا ماندو بس ، دي برضك بلدنا يا جدع ؟
ماندو : احنا مش لسه حاضرين لها فرح من كام شهر وكانوا هايجوزوها برضه وفيه اتنين متقدمين ليها ، جدع اسمه شفيق ، وجدع بركة بدقن كان متقدم معاه ؟
سامبو : ماهو اهلها ما رضيوش بشفيق يا راجل ، وادوها للراجل البركة محمد مرسي مبارك ، ما هي اختارته وما حدش غصب عليها.
ماندو : ايه ده مبارك تاني .. هي مش كانت متجوزة مبارك ده قبل كده .. وأهلها ما عجبهومش الكلام وخلعوها منه بالضالين ، تقوم تتجوز مبارك تاني ..هي ما بتحرمش ؟!
سامبو : تصدق معاك حق .. البلد دي باين عليها فقرية زي ما انت قولت وتستاهل كل اللي يجرالها ، دي جابت لنا العار ، وحطت وشنا في الطين يا راجل ، خش علي بواحدة أبو صليبة يا معلم.. وياللا بينا من هنا نروح طنطا ولا اسكندرية أهي أي بلد تانية يكون عندها دم غير البلد المخروبة دي .
تفلح حملة « تمرد « في جمع توقيعات نصف الشعب المصري في جميع المحافظات ، ويسلموا كراتين النماذج للهيئة العليا للانتخابات كما يقضي القانون ، يعلم الإخوان بالموضوع ويتابعونه بمخطط سري على مدي شهور ، يبدل الإخوان كراتين النماذج بكراتين أخرى من عندهم ويزورون توقيعات الشعب عليها ، تأتي ساعة الحسم يتجمع ملايين المصريين واللجنة تفتح الكراتين أمام وسائل الإعلام وتفرزها ، يخرج صفوت حجازي وآيات النصر ترقص على محياه صائحا بأعلى صوته : الله أكبر ولله الحمد ..الرئيس المؤمن محمد مرسي عيسى العياط.. اكتساح ، الشعب كله قال كلمته ..وأحبط مخططات جبهة الخراب ومن وراءها .. هنيئا لك يا ريس إن العزة إلا لله .
ملايين المصريين المصابين بالنقطة يهجمون على كراتين النماذج ويمسكون الأوراق المذيلة بتوقيعاتهم , ليجدوا النص التالي مكتوبا فيها : « أنا المواطن المصري الأصيل أعلن أنني استخرت الله وقبلت زواج الرئيس محمد مرسي عيسى العياط من والدتي الحاجة مصر على الصداق المسمى بيننا عاجله وآجله ما علمت منه وما لم أعلم ، والله على ما أقول شهيد ، بارك الله لهما وبارك عليهما ، وخرجنا منها على خير « ، مع تحيات حركة تمرد براحتك ... الريس مسامحك .