تنابلة السلطان.. الواقع والخيال

بقلم: لواء متقاعد/ نبيل أبو النجا

تنابلة السلطان...الواقع والخيال ضحك التنبل بملئ فاه رغم أن ذلك كلفه الكثير حيث اضطر لفتح فاه ثم أغلق شفتيه وأخذ يعض علي شفتيه بالنواجز ويكتم الغيظ ويصرخ قائلا: يااخونا...ياتنابلة الراجل المحافظ بعت عربيات ميه علشان المتظاهرين يتوضوا ويشربوا شوفوا الحنيه والقلب الرهيف الوطني اللي خلاه يعمل كده, يا سلام والله ياولاد البلد لسه فيها جدعان. استشاط غضبا كبير التنابلة وقال له: بلاش تقول إخوان دي تاني, احنا تنابلة ويشرفنا نفضل تنابلة وموش حانغير جلدنا لإن احنا موش بنتلون وثابتين علي مبدأ
تدخل تنبل لتهدئة النفوس قائلا‏:‏ ياجماعة‏...‏صلوا علي النبي
اضطر كبير التنابلة إلي الحركة وناوله بعصا علي رأسه وهو يردد‏:‏ هوه أنا قلتله بلاش إخوان تقوللي انت جماعة‏,‏ انتوا إيه حكايتكم هما الإخوان والجماعة بقوا علي كل لسان وفي كل حاجة طالعين زي العفريت وعششوا في مخكم خلاص‏.‏
أجاب التنبل اللي كان بيضحك وبعدين صرخ من الغيظ‏:‏ المهم يا كبير الراجل المحافظ الشهم ده لازم البلد تكافؤه علي الميه دي والإنسانية دي ووالله أنا ما شفت كده في أي مظاهرة من المظاهرات اللي ما بتخلصشي ديه‏,‏ دا الداخلية بتنزل فيهم فين يوجعك وتلاقي الإسعاف شغالة علي طول تشيل ناس‏,‏ أنا موش عارف إيه اللي حصل والحال اتغير‏,‏ سبحان مغير الأحوال‏.‏
رد عليه التنبل النور‏(‏ الشاطر‏):‏ ياابني أنا واحد اعرفه جالي امبارح وقاللي كنت ماشي رايح أودي العيال وامهم جنينة الحيوانات لأني زهقت من البني آدمين وعند كوبري الجامعة من ناحية الجيزة لقيت علي شط النيل يافطة كبيرة عليها‏(‏ الهيئة العامة للنظافة والتجميل‏-‏محافظة الجيزة‏)‏ وأمامها مباشرة في النيل أكوام من الزبالة الطافية فوق الميه إيشي علب بيبسي وقزايز ميه وكراتين واللي قلبك يحبه ورائحة عفنة‏,‏ وجنبها علطول خمس ست مراكب نزهة ومرسي حديث هذه الأيام وحتة كام متر في كام متر ولوحة عليها‏(‏ مرسي ومشتل اسماعيل سند‏)‏ وعلي الرصيف قبالة المرسي والمشتل قهوة بلدي للمدعو اسماعيل سند وعدة كراسي وكنب وشيشة وسخن وساقع وأكل وكل حاجة وطبعا اللي جالسين رجال الشرطة والأمن والإنقاذ النهري اللي راكن لنشه جنب المراكب في حضنها وطبعا المكان زريبة لكن الشهادة لله الراجل بيرش علي الكل وماحدش يقدر يفتح بقه‏,‏ والحتة بقت زفت في زفت ولاقيت اتوبيس من بتاع السياح وقف وفضلوا يصوروا الفضايح دي ويضحكوا علي النيل اللي بقه ترعة مليانة زبالة وأمام‏(‏ الهيئة العامة للنظافة والتجميل بالجيزة‏),‏ وطبعا هذا الشط مليان مراكب سياحة وكل مخلفاتها تنتشر علي وجه النيل أما شط النيل فمكتظ برجال الأمن والكراسي والأكل اللي قلبك يحبه والذي منه وكله ثواب في ثواب‏,‏ موش بقوللك أنا شاطر وبديع في قفشاتي والله دي نكتة‏.‏
صاح تنبل مدهول علي نفسه‏:‏ إمال الراجل المحافظ الشهم ده فين‏.‏
أجابه علي الفور التنبل الشاطر في صوت بديع جهوري‏:‏ طبعا في مكتبه يا‏....‏وخلاص‏.‏

‏nabil.aboualnaga@gmail.com‏

رابط دائم :