الشاطر من قطر: خطفنا الثورة وركبناها.. وهنركب مصر كلها !!

بينما كنت فى زيارة لأصدقائى الفشارين فى دولة قطر الشقيقة للترتيب لمؤتمر الفشر العالمى الذى سيقام هناك برعاية الشيخة "موزة" باعتبارى رئيس رابطة الفشارين العربية والشرق أوسطية وبينما كنت عائدًا للفندق الذى يستضيفوننى به إذا بى ألمح المهندس خيرت الشاطر، نائب مرشد الإخوان المسلمين جالسًا فى بهو الفندق يتصفح جريدة فيتو الورقية.. سرت نحوه وسلمت عليه فقال لى: رب صدفة خير من ألف ميعاد ياعم أبوطقة !! .. قلت: هذا يعنى انك كنت تفكر فى لقائى يا هندسة !! .. قال: لماذا يكرهنا زملاؤك فى جريدة فيتو يا عمنا ؟!! .. قلت : زملائى الفشارون ؟ .. قال : لا بل زملاؤك الصحفيون.. قلت : طب انت شايفنى صحفى يا هندسة.. يعنى شايف الكاميرا هتقطع كتافى ولا شايف الورق الدشت يتطاير حواليا ؟!.. قال مش قصدى كده.. المهم انك بتكتب معاهم فى الجريده !!.. قلت : هات من الاّخر ياعم خيرت !! .. قال : احنا زعلانين منكم جدا على فكره ولا نريد أن نأخذ موقفا معاديًا تجاه الجريدة وأنا أمنع عنكم شباب الإخوان المتحمس للفتك بكل من فى الجريدة !! قاطعته قائلا: كلامك مش عاجبنى يا أخ خيرت وإذا كنت انت وشبابك تستطيعون فعل شىء فافعلوه.. انت آخرك تروح تأجر ولاد أبوإسماعيل يعملوا معانا كما فعلوا مع جريدة الوفد.. بس ساعتها مش هنبلغ الشرطة كما فعل الوفديون.
وأنت تعرف كيف سيكون رد فعل أبوطقة وحده عليكم !! .. قال: نحن لا نستطيع فعل ذلك مع جريدة بها عمنا أبوطقة ووجودك انت وعمنا سحلول وسطوطة هانم هو الذى يمنعنا عنهم وأديك شايف ولاد أبوإسماعيل مش لاقيين مصلحة اليومين دول طالما انك هارش الفولة كده !! .. قلت: طبعا انت هنا علشان ترجع بشنطة الريالات والدينارات والدولارات القطرية لأصدقائك فى مصر !! .. قال : إيه رأيك يا عمنا تاخد اللى انت عايزه وتيجى انت وزملاؤك الفشارون عندنا فى جريدة الحرية والعدالة وهنعملكم درب الفشارين أجدع ألف مرة من بتاع فيتو !! .. قلت: بس انتو مش محتاجين فشارين فى الحزب، فالإخوان كلهم فشارون وانت أولهم.. قال عيب عليك ياعم أبوطقة انت بتكلم خيرت الشاطر اللى اشترى نصف مصر حتى الآن وبيحاول مع النصف الثانى !!.. قلت: هذه سياسة اليهود الذين اشتروا كل شىء فى فلسطين حتى احتلوها.. لكنك فى مصر يا روح الروح مهما اشتريت لن تستطيع شراء المصريين أبناء البلد ولا تكرر مثل هذا الكلام أمامى مرة ثانية وحاول أن تأكل عيشك أنت والإخوان فى البلد بعيدًا عنى وإلا انت تعرف التفاصيل !!
وهنا لملم حقيبته ونظر لى بغيظ وقال: ماشى ياعم أبوطقة هتندم بعد انتخابات مجلس الشعب وأخونة مصر بالكامل فكما خطفنا الثورة وركبناها سوف نخطف مصر كلها ونركبها وندلدل أرجلنا !! .. فقلت له: الكلام ده هناك عند المرشد يا روح المرشد.. استنانى يوم 25 يناير هقلبلك عاليها واطيها ونبقى نبدأ مع بعض من النقطة صفر "زيرو يعنى" !! وهنا عاد ناحيتى فتركته ورحلت وهو ينادى: طب نتفاهم يا عمنا.. عمومًا لنا لقاء فى مصر واللى انت عايزه هيكون يا كبير !!